03:11 20 հուլիսի 2018
Ուղիղ եթեր
  • USD480.60
  • GBP624.64
  • EUR557.74
  • RUB7.57
Футбол. РФПЛ. Матч Спартак - Динамо, Роман Березовский

Ալեքսանդր Բերեզովսկի. Ռոմանը միշտ էլ հպարտությամբ է կրել Հայաստանի հավաքականի մարզաշապիկը

© Sputnik / Владимир Песня
Էքսկլյուզիվ
Ստանալ կարճ հղումը
29520

Մարտի 25-ին «Հանրապետական» մարզադաշտում կայանալու է Հայաստան – Բելառուս ընկերական խաղը, որը դառնալու է մեր հավաքականի դարպասապահ Ռոման Բերեզովսկու հրաժեշտի խաղը

Խաչիկ Չախոյան, Sputnik.

Շատերը գիտեն, թե ինչպես է Ռոմանը պաշտպանել մեր հավաքականի դարպասը`շատ անգամ դառնալով մեր թիմի կազմում լավագույն ֆուտբոլիստը: Բայց քչերը գիտեն, թե ինչպես է կերտվել Ռոման Բերեզովսկի դարպասապահը, ինչպես է հղկել իր վարպետությունը և վերջապես ո՞վ է եղել Ռոման Բերեզովսկու գլխավոր խորհրդատուն: Կա ևս մեկ Բերեզովսկի, որը կարծես թե ֆուտբոլային կյանքի ստվերում է մնացել: Պարզվում է, որ Ռոմանը հիմնականում պարտական է իր ավագ եղբորը՝ Ալեքսանդր Բերեզովսկուն, նա է առաջին անգամ Ռոմանին տարել խաղադաշտ ու միշտ հետևել է իր կրտսեր եղբոր մարզական կարիերային:

– Ալեքսանդր, Ձեր ու Ռոմանի միջև տարիքային բավականին մեծ տարբերություն կա: Եվ ինչպե՞ս ստացվեց, որ Ռոմանը սկսեց զբաղվել ֆուտբոլով:

– Ռոմանն ինձանից փոքր է 14 տարով: Ծնողներս աշխատում էին Արփա-Սևան նախագծում, ու մենք 1974 թվականին բնակարան ստացանք ու տեղափոխվեցինք: Ես սովորում էի ֆիզկուլտուրայի ինստիտուտում: Ես ել եմ եղել սպորտսմեն, բայց` հեծանվորդ: Հայաստանի հավաքականի կազմում մասնակցել եմ նախկին ԽՍՀՄ սպարտակիադաների: Բայց միշտ սիրել եմ ֆուտբոլը: Ինստիտուտում մեր խմբում ես ընկեր ունեի՝ Կայֆաջյան Սերգեյը, որը թեթև ատլետ էր, բայց նույնպես շատ էր սիրում ֆուտբոլը: Մենք երկուսս էլ միշտ հետաքրքրվում էինք ֆուտբոլային իրադարձություններով: Նա Մոսկվայի «Սպարտակի» երկրպագու էր, ես` Դոնեցկի «Շախտյորի»: Ինստիտուտն ավարտելուց հետո Սերգեյն անմիջապես անցավ մարզչական աշխատանքի ներկայիս «Փյունիկի» դպրոցում, որն այն ժամանակ կոչվում էր ՕՌՄՊԴ (օլիմպիական ռեզերվի մանկապատանեկան դպրոց): Ռոմանն այդ ժամանակ յոթ տարեկան էր: Ես էլ նրան բերեցի Սերգեյի մոտ մարզվելու:

– Իսկ ինչպե՞ս ստացվեց, որ Ռոմանը դարպասապահ դարձավ:

– Մի քանի մարզումների ընթացքում Ռոմանը մարզվում էր ու այն դիրքում, որտեղ ուզում էր Կայֆաջյանը: Հետո ինչ-որ խնդիր առաջացավ դարպասապահի հետ, ու Ռոմանը հայտնվեց դարպասապահի դիրքում ու մնաց որպես դարպասապահ:

– Այդ տարիքում Ռոմանը կարճահասակ էր բոլորից: Հետաքրքիր է, որ դարպասապահի դիրքում հաստատվեց:

– Մի անգամ փորձելուց հետո Սերգեյ Կայֆաջյանը չուզեց ուրիշ դարպասապահ տեսնել: Ինչ վերաբերում է հասակին, ապա մեր գեներն այնպիսին են, որ հասակը սկսում է ավելանալ անցումային տարիքից հետո: Ու Ռոմանն էլ բարձրահասակ դարձավ մի քանի տարի անց:

– Ռոմանը հաճույքո՞վ էր գնում մարզումների, թե ինչ-որ տեղ դու ստիպում էիր:

– Երբեք չեմ ստիպել: Նախ Ռոմանը ինձանից բավականին փոքր էր ու լսում էր, բացի այդ էլ սիրում էր ֆուտբոլը: Կամ ես էի տանում մարզման, երբեմն էլ, երբ զբաղված էի լինում, Նորքի զանգվածից երթուղայինով ինքնուրույն էր գնում:

– Ես զրուցել եմ Ռոմանի մանկության ընկերների հետ, և նրանք կարծում են, որ Ռոմանի՝ որպես դարպասապահ կայացման գործում դուք շատ մեծ ներդրում ունեք:

– Երբ Ռոմանը փոքր էր, մենք նրան մանկապարտեզ տարանք, ու պարզվեց, որ ռուսական մանկապարտեզում տեղ չկա: Գնաց հայկական: Հենց այնտեղ էլ սովորեց հայերենն ու հայերի հետ շփվելը: Բացի այդ, ընտանեկան դաստիարակությունն էլ իր ազդեցությունը, իհարկե, ունեցավ: Եղբայրս միշտ խելոք ու խոհեմ տղա էր ու մեծերի խոսքը երբեք գետնով չէր տա: Երբ սկսեց մարզվել ֆուտբոլով, ես անընդհատ զրուցում էի մարզիչ Սերգեյ Կայֆաջյանի հետ, ու նա ասում էր, որ Ռոմանը շատ լավ տվյալներ ունի բարձրակարգ դարպասապահ դառնալու համար: Ու երբ մի քանի մրցումներից հետո նա վերադարձավ լավագույն դարպասապահի մրցանակով, ես հասկացա, որ ամեն ինչ պետք է անեմ, որ ջուրը չգցենք մեր ընդհանուր աշխատանքը:

– Կարելի՞ է համարել, որ Սանկտ Պետերբուրգ գնալը բեկումնային եղավ Ռոմանի մարզական կարիերայում:

– Երևի այո: Սանկտ Պետերբուրգի մի քանի թիմերում հանդես գալուց հետո, 1995 թվականին Ռոմանը հրավեր ստացավ «Զենիթից»: Վաղամեռիկ Պավել Սադիրինը, որը գլխավորում էր «Զենիթը», ընկերական խաղում նկատեց Ռոմանին ու հրավիրեց «Զենիթ»: Բայց մինչ այդ նա խաղաց Հայաստանի երիտասարդական հավաքականի կազմում: Երջանկահիշատակ Հովհաննես Զանազանյանը նրան հրավիրեց: Հետո բանակի խնդիր առաջացավ: Իսկ 1996 թվականին Ռոմանն առաջին խաղն անցկացրեց ազգային հավաքականի կազմում՝ Խորեն Հովհաննիսյանի կողմից ընդգրկվելով մեր առաջին թիմի կազմում:

– Հիմա արդեն տարիներ անց դուք հպարտություն զգու՞մ եք Ռոմանի համար:

– Արդեն նշեցինք, որ Ռոմանը ինձանից 14 տարի փոքր էր: Կարծես թե իմ տղան լիներ, ու ես, իհարկե, հիմա ինձ շատ լավ եմ զգում, երբ իմ եղբոր հասցեին բարյացակամ խոսքեր են հնչում: Ու հայ ազգն արդեն իսկ գնահատել է Ռոման Բերեզովսկին կատարած աշխատանքի համար: Ես շատ ուրախ եմ, որ իմ եղբայրը ֆուտբոլի ու հասարակության համար շատ պիտանի մարդ է:

– Ժամանակին օլիմպիական չեմպիոն Իգոր Նովիկովի համար ասում էին, որ նա Հայաստանի` ազգությամբ ռուս զավակն է: Կարծում եմ` նույնը կարելի է ասել Ռոմանի համար:

– Ռոմանը ծնվել է Երևանում, դաստիարակվել ու մեծացել հայկական մթնոլորտում: Ես չգիտեմ, թե ինչ կարելի է նրա համար ասել, բայց Հայաստանի ազգային հավաքականի մարզաշապիկը Ռոմանը միշտ կրել է հպարտությամբ: Եվ այդ զգացումը եղել է մեր ամբողջ ընտանիքի մոտ:

 

Գլխավոր թեմաներ

  • ՀՀ ԶՈւ զինծառայողներ

    Ադրբեջանական լրատվամիջոցները շարունակում են պնդել, որ Հայաստանի գերի ընկած քաղաքացի Կարեն Ղազարյանը դիվերսանտ է։ Համացանցում հայտնվել են լուսանկարներ, որոնք իբր ապացուցում են այդ փաստը։ Հայաստանի պաշտպանության նախարարությունը բացահայտել է ֆեյքը, իսկ Sputnik Արմենիային հաջողվել է շփվել լուսանկարում պատկերված մարդու հետ։

    306
  • Նիկոլ Փաշինյանը Դոնալդ Տուսկի հետ. Բրյուսել 12 հուլիսի 2018 թ.

    «Թավշյա» հեղափոխության անարյուն լինելը և բռնի ուժի բացակայությունը հիացմունքի արժանացավ թե ՛ Եվրոպայում, թե՛ ԱՄՆ–ում. բայց և այնպես՝ արևմուտքից ոչ ոք չի շտապում Հայաստանը ողողել նյութական օգնությամբ և գործարար ներդրումներով։ Դա պարզ է դարձել Փաշինյանի` Բրյուսել կատարած ուղևորությունից հետո, և դա հաստատել է Հայաստանում ԱՄՆ դեսպան Միլսը։

    158
  • Ռուբեն Հայրապետյան. ՀՖՖ նախագահ

    Մենք այժմ ֆուտբոլում ականատես ենք լինում բրոունյան շարժման։ Խառնաշփոթ ակումբներում, հակասություններ ֆեդերացիայի նախագահ Ռուբեն Հայրապետյանի վարքում. կանխատեսում են, որ նրա տեղը կզբաղեցնի Ազգային անվտանգության ծառայության տնօրենը, նա համաձայնում է, բայց ասում՝ կարող է պաշտոնը զիջել Յուրի Ջորկաեֆին։ Փորձենք հասկանալ։

    219