Լաուրա Սարգսյան, Sputnik Արմենիա
Արաբական Միացյալ Էմիրություններում հայերը հիմնականում զբաղված են բիզնեսի և շինարարության ոլորներում: Հայերին են այստեղ պատկանում առաջատար զբոսաշրջային գործակալությունները, ինչպես նաև մի քանի խոշոր հինգաստղանի հյուրանոցներ ունեն Դուբայում, Շարժայում և Աբու Դաբիում:
«Այստեղ եմ տեղափոխվել Լիբանանից: Սկզբում աշխատել եմ շինարարության վրա, մի քանի տարի հետո ինքս եմ հինգաստղանի հյուրանոց բացել: Ինչպես ամեն տեղ, այստեղ էլ շատ դժվար էր, դու յուրային չես, բացի այդ, համայնքն էլ, ի տարբերություն լիբանանյան համայնքի, այդքան ազդեցիկ չէ»,- Sputnik Արմենիայի թղթակցի հետ զրույցում ասաց Դուբայի հինգաստղանի հյուրանոցներից մեկի հիմնադիր Արման Հակոբյանը (անունը փոխված է):
Անկախ դժվարություններից և աշխարհընկալման տարբերությունից՝ հայերին հաջողվել է վաստակել ոչ միայն արաբների, այլև այստեղ աշխատելու եկած պաղեստինցիների և ֆիլիպինների հարգանքը:
Պաղեստինցի Ալբին մինչ ԱՄԷ տեղափոխվելը Հայաստանի և հայերի մասին ոչինչ չգիտեր: Այսօր նա շատ հայ ընկերներ ունի: Նրանցից մեկի տուրիստական գործակալությունում տաքսու վարորդ է աշխատում. Զբոսաշրջիկների է տեղափոխում, ապահովում օդանավակայանից հյուրանոց նրանց փոխադրումը:
9 միլիոնանոց մուսուլմանական երկրում, եթե դու եվրոպացու արտաքին ունես, քեզ ծուռ հայացքով են նայում: Ձուլումից խուսափել հայերին օգնում է եկեղեցին և դպրոցը: ԱՄԷ-ում, վիճակագրական տվյալների համաձայն, շուրջ 7 հազար հայ է բնակվում, որոնցից 2 հազարը Աբու Դաբիում, 5-ը Շարժայում և Դուբայում և զբաղվում է խոշոր բիզնեսով ու ներգրավված է զբոսաշրջային ոլորտում:
Շարժայում է ապրում նաև Խաժակ Նազարյանը, տեղափոխվել է Քեսաբի (Սիրիա) ջարդի ժամանակ: Այսօր նա աշխատում է քաղաքի միակ հայկական Սուրբ Գրիգոր Լուսավորիչ եկեղեցում որպես քարտուղար: Եկեղեցին հիմնադրվել է 1998 թվականին, ավելի ուշ եկեղեցու բակում կառուցվեց Հովհաննիսյանի անվան դպրոց: Հովհաննիսյանը եկեղեցու և դպրոցի բացման նախաձեռնողն է:
«Կիրակնօրյա դպրոց է, հայոց լեզվի և պատմության դասերն անցկացվում են շաբաթական մեկ օր` շաբաթ օրը: Ընդհանուր առմամբ, մեզ մոտ 170 աշակերտ է սովորում»,- Sputnik-ի հետ զրույցում ասաց Խաժակը:
Նրա խոսքով` դպրոցը մեծ դեր է խաղում հայապահպանության հարցում: Այդ առումով օգնում են նաև Շարժայում գործող եկեղեցիները, ինչպես նաև Աբու Դաբիի Սրբոց Նահատակաց եկեղեցին:
«Մենք ամեն կերպ փորձում ենք չձուլվել օտար միջավայրում, թեև տարեցտարի խառնածին ամուսնությունների թիվն ավելանում է: Եթե աղջիկը հայուհի է, իսկ տղան` արաբ, ապա աղջիկը սկսում է իսլամ դավանել: Եթե տղան հայ է, իսկ նրա ընտրյալը` ոչ, ապա, մեծամասամբ, հարսանիքն անցնում է հայկական ավանդույթների համաձայն»,- ասաց Խաժակը:
Առավել հաճախ հայերը եկեղեցի են այցելում ձմռանը, երբ մի շարք եկեղեցական տոներ են լինում: Վանքն ամբողջ օրը գործում է միայն ուրբաթ և շաբաթ օրերերին, մյուս օրերին այն բաց է միայն մինչև առավոտյան ժամը 11-ը:
