ԵՐԵՎԱՆ, 13 դեկտեմբերի — Sputnik. Արամ Գարեգինյան. Աղետի հետքերը Հալեպում դեռ ամենուր են, սակայն քաղաքի քրիստոնյաներն արդեն Ամանորի տոնածառ են կանգնեցրել:
Ինչպես Sputnik Արմենիայի թղթակցի հետ զրույցում ասաց Սիրիայի խորհրդարանի պատգամավոր Ժիրայր Ռեիսյանը, տոնածառը տեղադրել են Սուլեյմանիե քրիստոնեական թաղամասի բնակիչները, այդ թվում՝ քրիստոնյա արաբներն ու հայերը:
Թաղամասի հրապարակում տոնածառը կանգուն էր նաև անցյալ տարվա դեկտեմբերին, երբ քաղաքը դեռ նոր էր ամբողջությամբ ազատագրվել:
«Տոնածառ տեղադրելը հատուկ երևույթ մը չէր, այլ պարզապես՝ տոնական երևոււթ: Այս տարի ալ նույն տեղին մեջ դրուած է», — ասաց Ռեիսյանը:
Հալեպի հռչակավոր շուկաներում արդեն հատուկենտ տաղավարներ են բացվել: Սեպտեմբերին առևտուրը վերսկսվել է ՅՈՒՆԵՍԿՕ-ի ժառանգության վայրում՝ աշխարհահռչակ ալ-Մադինայում, որը գործող միջնադարյան շուկաներից խոշորագույնն է աշխարհում (նրա տաղավարների շարքերը միասին 13 կիլոմետր երկարություն ունեն, իսկ պատմությունը գրեթե 600 տարվա է): Իսկ նոյեմբերի վերջին վերագործարկվել է մեկ այլ միջնադարյան շուկա՝ Խան ալ-Ջումրուքը: Սա, իհարկե, դեռ շատ հեռու է զբոսաշրջային երբեմնի եռուզեռից: «Քիչ մը կանուխ է ատոր մասին խօսիլ: Բայց մէջընդմէջ կայցելեն նախկին սուրիացիներ՝ կարոտով ու հետաքրքրութեամբ», — հավելեց պարոն Ռեիսյանը:
Տոները՝ տոներ, բայց վերաշինության առօրեական գործը մեկ րոպե իսկ չի դադարում: Բնակիչներն ուզում են օր առաջ վերանորոգել իրենց տներն ու արհեստանոցները: Չեն անտեսվում նաև համայնքային ու եկեղեցական կառույցները:
«Վերջերս Կիլիկիոյ կաթողիկոսութեան ընդհանուր ժողով կայացած է, ուր Արամ Վեհափառը երախտիք է յայտնած հայ գաղութներուն, որք իրարու ձեռք կ՛երկարեն վերաշինութեան համար: Շատ կեդրոններու, այդ թվում՝ Հալէպի Քառասնից մանկանց մայր եկեղեցու վերաշինութեան նախագծեր արդէն ներկայացուած են: Ատոնց գործնականացման աշխատանքն ալ շուտով պիտի սկսուի», — հավելեց Ռեիսյանը:
Այդուհանդերձ, հայ համայնքն իրեն չի կղզիացնում Սիրիայի ժողովրդից: Մի քանի օր առաջ ընդունվեց 2018 թվականի Սիրիայի պետական բյուջեն: Այն հարցին, թե որքան գումար է տրամադրվել հայ համայնքի կրթական ու մշակութային հաստատությունների համար, պատգամավոր Ռեիսյանն առարկեց. «Սուրիոյ մէջ հատուածներու մասին ոչ մեկը կը խոսի. կայ սուրիացի ժողովուրդ, ուր հայն ալ կայ, ոչ հայն ալ: Հետեւաբար, եթե վերականգնումի շուրջ որևէ օժանդակութիւն կա, կարիքներու համաձայն պիտի բաշխուի»:
Վերակենդանանում են նաև գործարար կապերը Հայաստանի հետ: Հոկտեմբերի վերջին Հայաստանի տնտեսական զարգացման և ներդրումների նախարար Սուրեն Կարայանն այցելել է Սիրիա, որտեղ հանդիպել է էկոնոմիկայի և արտաքին առևտրի նախարար Մուհամմադ Սամեր Խալիլի, զբոսաշրջության նախարար Բուշր Յազջիի հետ: Կողմերը պայմանավորվել են անցկացնել գործարար շրջանակների փոխադարձ հանդիպումներ:
Այս արդյունաբերական ու զբոսաշրջային շաբաթներից, որոնք պիտի կազմակերպվեն Երևանում ու Դամասկոսում, որոշակի սպասելիքներ կան, եզրափակեց Սիրիայի հայ պատգամավորը:
