ԵՐԵՎԱՆ, 22 մարտի — Sputnik, Անի Լիպարիտյան. Հայ ֆերմերները որոշել են Արմավիրի մարզում աբերդին–անգուսյան ցեղատեսակի ցլեր բուծել։
Sputnik Արմենիայի թղթակիցներն այցելել են Փշատավան գյուղ, որպեսզի երկրի միակ անգուսներին սեփական աչքերով տեսնեն և հասկանան, թե ինչպես են նրանք այստեղ ապրում։
«Մենք երկու տարի առաջ Հայաստան ներմուծեցինք աբերդին–անգուսյան ցեղատեսակի ցուլ և կովեր։ Ուզում ենք հասկանալ` արդյո՞ք նրանք կարող են ապրել մեր բնակլիմայական պայմաններում։ Նրանց ԱՄՆ–ից Ռուսաստան էին բերել, այնուհետև Հայաստան», – պատմում է ջայլամաբուծության գլխավոր մասնագետ, զոոտեխնիկ Արմեն Սարգսյանը։
Այժմ գյուղացիների կովերը սերունդ պիտի տան, կովերը հղի են։ «Էկզոտիկ» կենդանիների տերերը հասկանալ են ուզում, թե նորածիններն ինչպես կընկալեն հայկական կլիման, մեր բնությունը։
Պարզվել է, ձմռանը խոշոր, սակայն ոչ եղջերավոր այս անասունները, կարող են փողոցում գտնվել նույնիսկ 15-20 ջերմաստիճան ցրտի պայմաններում, բացի այդ արևի ճառագայթներն էլ վտանգավոր չեն նրանց համար։
«Իրենց քաշով նրանք տեղի կովերից ու ցլերից ավել են։ Մեծերը մոտ 600-700 կգ են կշռում։ Նրանք շատ հանգիստ են, ագրեսիվ վարք չեն դրսևորում, լավ են ապրում մեր ֆերմայում։ Նրանց մասին հոգ տանելն ու խնամելը դժվար չէ», – վստահեցրեց Sputnik Արմենիայի զրուցակիցը։
Ֆերմայում մենք ինքներս համոզվեցինք, որ անգուսներն ուտում են տեղի խոտը և որևէ հատուկ կեր չեն օգտագործում։
Սարգսյանն ավելացրեց, որ եթե ստացված սերունդը Հայաստանի կլիմայական պայմաններում լավ զգա իրեն, ապա իրենք մտադիր են ավելի շատ ցուլ ստանալ, ինչպես նաև մինչև 2018 թվականի վերջ ևս 70 գլուխ ներմուծել։
Իսկ եթե անգուսների օրգանիզմը ընտելանա տեղի կլիմային, ու բիզնեսը զարգանա, ապա հետագայում հնարավոր կլինի միս արտադրել։ Այժմ Փշատավանի ֆերմայում երկու աբերդին–անգուսյան կով և մեկ ցուլ կա։