00:46 20 ապրիլի 2021
Ուղիղ եթեր
  • USD522.21
  • GBP725.66
  • EUR628.69
  • RUB6.87
Էքսկլյուզիվ
Ստանալ կարճ հղումը
ՀՀ վարչապետ Նիկոլ Փաշինյան (1183)
29812

Ապրիլի 7-ին Մոսկվա կատարելիք այցից առաջ ՀՀ վարչապետ Նիկոլ Փաշինյանը ՌԻԱ Նովոստիին ասել է՝ ինչ թեմաներ է քննարկելու ՌԴ նախագահ Վլադիմիր Պուտինի հետ, խոսել է հայկական բանակում տիրող իրավիճակի մասին, անդրադարձել է ԶՈւ գլխավոր շտաբին ու ԱԺ արտահերթ ընտրություններին:

- Դուք հայտարարել եք Ռուսաստանից նոր սպառազինություն գնելու ծրագրերի մասին, խոսքը վերաբերում է նաև Սու-30ՍՄ կործանիչներին, երկիրն ունի՞ նման միջոցներ, թե՞ Մոսկվայից է վարկ ակնկալում: Այդ մասին խոսելո՞ւ եք Պուտինի հետ բանակցությունների ժամանակ։ Չե՞ք կարծում, որ ղարաբաղյան հակամարտությունը Երևանի համար ձախողմամբ ավարտվեց բանակի վատ վիճակի և նորմալ սպառազինության բացակայության պատճառով։ Ռուսաստանից անօդաչու թռչող սարքեր, անօդաչու սարքերի դեմ պայքարելու համար միջոցներ կխնդրե՞ք, թե՞ կդիմեք այլ երկրների արտադրողներին: Հիմա ինչպիսի՞ հարաբերություններ ունեք զինվորականների հետ:

- Ռուսաստանի Դաշնության նախագահի հետ հանդիպման օրակարգում կլինեն հայ-ռուսական դաշնակցային հարաբերությունների բոլոր ոլորտները, այդ թվում՝ ռազմատեխնիկական ոլորտի համագործակցությանը վերաբերող հարցերը: Հայաստանի Հանրապետության զինված ուժերը ժամանակակից ռազմատեխնիկական միջոցներով համալրելու գործընթացը եղել և լինելու է մեր առաջնահերթություններից մեկը, ու այդ հարցը մշտապես ուշադրության կենտրոնում է լինելու։

Հայաստանի զինված ուժերում լայնածավալ բարեփոխումներ են սկսվել, որոնք իրականացվում են նաև մեր ռուս գործընկերների հետ սերտ համագործակցությամբ։ Համոզված ենք, որ այս համագործակցությունը հաջողությամբ կշարունակվի, Հայաստանի կառավարությունը շահագրգռված է այդ հարցում։

Զինված ուժերի գլխավոր շտաբի հետ կապված իրավիճակը կարգավորվել է, և բանակը կառավարության հետ լիարժեքորեն շարունակելու է երկրի անվտանգության ապահովմանն ու ամրապնդմանն ուղղված քայլերը:

ՀՔԾ-ում պաշտոնյաներ են հարցաքննվել․ Փաշինյանին նույնպես ծանուցում է ուղարկվել. «Ժողովուրդ»

- Ի՞նչ հետևություններ արեցիք վերջին ժամանակաշրջանում Երևանում անցկացված բողոքի ակցիաներից, կարծում եք՝ ձեր կուսակցությունը կարո՞ղ է ընտրություններում հաղթել հասարակության ներկայիս տրամադրությունների պայմաններում: Ձեր քաղաքականության մեջ ի՞նչ փոփոխություններ եք պատրաստ առաջարկել մարդկանց։ Մի քանի տարի շարունակ ընթացքում դուք Ռուսաստանը չէիք դիտարկում որպես արտաքին քաղաքականության գերակայություն։ Այդ մոտեցումը հիմա փոխվե՞լ է, ինչպե՞ս կլինի ընտրություններից հետո։

- Ընտրարշավն ու ընտրությունները ցույց կտան, թե քաղաքական որ ուժն է վայելում քաղաքացիների վստահությունը։ Մենք մշտական կապի մեջ ենք մեր ժողովրդի հետ և լիովին հասկանում ենք նրանց խնդիրները, կարիքներն ու ցանկությունները։ Մենք հանրությանը կներկայացնենք այնպիսի ծրագրեր, որոնք ուղղված կլինեն Հայաստանի անվտանգության ամրապնդմանը, երկրի զարգացմանն ու բարեկեցության ապահովմանը։

Համոզված եմ, որ մեր հասարակությունը կկարողանա լեգիտիմ իշխանություն ձևավորել, իսկ մենք քաղաքացիների հետ շփումների ժամանակ կներկայացնենք առաջիկա տարիների մեր ծրագրերն ու նպատակները։

Ինչ վերաբերում է Ռուսաստանի հետ հարաբերություններին, ապա դրանք եղել և լինելու են Հայաստանի կառավարության առաջնահերթություններից, և վստահ եմ, որ այսուհետ ևս հայ-ռուսական դաշնակցային հարաբերությունները բոլոր ոլորտներում կզարգանան մեր ժողովուրդների միջև փոխվստահության և դարավոր բարեկամական կապերի հիման վրա։

- Ապրիլի 7-ին մոսկովյան այցի ընթացքում Հայաստան–Ռուսաստան–Ադրբեջան բարձր մակարդակով հանդիպում նախատեսվո՞ւմ է։

- Ապրիլի 7-ին հանդիպում է նախատեսված Ռուսաստանի Դաշնության նախագահ Վլադիմիր Պուտինի հետ։ ՌԴ նախագահի հետ հանդիպման ընթացքում կքննարկենք հայ-ռուսական դաշնակցային հարաբերությունների օրակարգային հարցերը, այդ թվում՝ տնտեսական ոլորտին վերաբերող։ Կքննարկենք 2020 թվականի նոյեմբերի 9-ի ու 2021 թվականի հունվարի 11-ի եռակողմ հայտարարությունների իրականացումը։

- Ավելի վաղ հայտարարել էիք, որ Հայաստանի զինված ուժերի բարեփոխման ընթացում մտադիր եք ավելի սերտ համագործակցություն հաստատել ՌԴ-ի հետ ու խոսել էիք հայ-ռուսական միացյալ խմբավորման ուժեղացման անհրաժեշտության մասին Ի՞նչ քայլեր են ձեռնարկվում այդ ուղղությամբ։

- Պետք է ասեմ, որ մենք արդեն ձեռնամուխ ենք եղել բանակի լայնածավալ բարեփոխմանը, և, հաշվի առնելով ՌԴ-ի հետ մեր սերտ դաշնակցային և գործընկերային հարաբերությունները ռազմական և ռազմատեխնիկական համագործակցության ոլորտում, համապատասխան խորհրդակցություններ են ընթանում, իսկ փորձագետների մակարդակով արդեն անհրաժեշտ շփումներ են հաստատվել:

- Արդեն որոշակիություն կա՞ երեք երկրների՝ Հայաստանի, Ռուսաստանի ու Ադրբեջանի կողմից անցկացվող՝ տարածաշրջանային տրանսպորտային հաղորդակցությունների ապաշրջափակման հարցերի շուրջ քննարկումներում: Ինչպե՞ս է աշխատանքն ընթանում: Մշակվե՞լ են արդյոք ճանապարհային քարտեզների նախագծեր, թե? աշխատանքը դեռ նոր է սկսվում։ Որքանո՞վ է ճանապարհների ապաշրջափակումը շահավետ տարածաշրջանի բոլոր երկրների համար:

- Մինչ այժմ քննարկվել են 2020 թվականի նոյեմբերի 9-ի հայտարարության 9-րդ կետի, ինչպես նաև 2021 թվականի հունվարի 11-ի հայտարարության 2-րդ, 3-րդ, 4-րդ կետերի իրականացումից բխող հարցերը: Ստեղծվել են երկաթուղային, ավտոմոբիլային ու համակցված փոխադրումների և փոխադրումների ապահովման հարցերով փորձագիտական ենթախմբեր՝ ներառյալ անվտանգությունը, սահմանային, մաքսային, սանիտարական, անասնաբուժական, բուսասանիտարական ու հսկողության այլ տեսակները:

Այս պահին արձանագրվել է, որ լրացուցիչ փորձագիտական աշխատանքներ իրականացնելու անհրաժեշտություն կա, և աշխատանքը պետք է շարունակվի։

Աշխատանքային խումբը ձևավորվել է միջազգային փոխադրումների հարցերը քննարկելու համար։ Այդ փոխադրումները Հայաստանի Հանրապետության և Ադրբեջանի Հանրապետության տարածքների հատում են պահանջում։

Քննարկվում են տրանսպորտային հաղորդակցությունների երկկողմ ապաշրջափակման հարցերը, ինչը կնպաստի Հայաստանի Հանրապետության տարանցիկ ներուժի ավելացմանը և տարածաշրջանում առևտրային կապերի զարգացմանը:

Եռակողմ աշխատանքային խմբի հաջորդ նիստի օրը համանախագահները կհամաձայնեցնեն աշխատանքային կարգով՝ հաշվի առնելով ենթախմբերի շրջանակներում տեղի ունեցող քննարկումները։

- Ձեր կարծիքով` ԱԺ արտահերթ ընտրությունները «հանգիստ» կանցնե՞ն։ Քաղաքական որոշ ուժերի ներկայացուցիչներ մտավախություն ունեն, որ նախընտրական գործընթացները և բուն ընտրությունները կարող են նոր ցնցումների հանգեցնել հասարակության մեջ, և հնարավոր է` փողոցներում անկարգություններ լինեն։ Ո՞րն է նրանց մտավախության պատճառը։

- Ինչպես գիտեք, մենք առաջարկեցինք խորհրդարանական արտահերթ ընտրություններ անցկացնել արցախյան պատերազմից հետո ստեղծված լարված քաղաքական իրավիճակից դուրս գալու համար, և վերջերս խորհրդարանական և արտախորհրդարանական ընդդիմության հետ քննարկումների արդյունքում որոշում կայացվեց հունիսի 20-ին արտահերթ ընտրություններ անցկացնել։

2018 թվականի դեկտեմբերի ընտրությունները բացառիկ էին այն առումով, որ 1996 թվականից ի վեր առաջին անգամ ընտրությունների արդյունքները չվիճարկվեցին Սահմանադրական դատարանում։ Մեզ հաջողվեց ապահովել լիովին թափանցիկ, ազատ և արդար ընտրություններ, որոնց արդյունքներն ընդունեցին բոլորը։ Դրանք նաև բարձր գնահատական ստացան միջազգային դիտորդական կառույցների կողմից։

Համոզված եմ, որ առաջիկա ընտրությունները ևս կանցնեն բարձր մակարդակով։ Վստահ եմ, որ այս անգամ էլ մեր ժողովուրդն իր ազատ կամքը կարտահայտի, ու լեգիտիմ իշխանություն կձևավորի։ Մենք կարող ենք ընտրություններն այնպես անցկացնել, որ դրանք վիճարկելու առիթ չլինի։

- Իշխող «Քաղաքացիական պայմանագիր» կուսակցությունը ընտրություններին կգնա ինքնուրույն, թե այլ ուժերի հետ դաշինքում: Հնարավո՞ր է արդյոք, որ ընտրությունների արդյունքում կոալիցիաներ ձևավորեն։

- «Քաղաքացիական պայմանագիր» կուսակցությունն այժմ պատրաստվում է ընտրությունների, և այդ առումով քննարկումները շարունակվում են։ Ինչ վերաբերում է կոալիցիայի ձևավորմանը, ապա այդ մասին կարելի է խոսել միայն ընտրությունների արդյունքների ամփոփումից հետո։

Սարգսյան-Փաշինյան քաղաքական առևտուրը քննարկումների փուլում է. քաղտեխնոլոգ

թեմա:
ՀՀ վարչապետ Նիկոլ Փաշինյան (1183)

Ըստ թեմայի

Ո՞րն էր Լևոն Տեր–Պետրոսյանի սխալն Արցախի հարցում, և հիմա ո՞ւմ է ուղղված նրա ասելիքը
Ռոբերտ Քոչարյանը ռևանշ կանի՞ Արցախում, եթե իշխանության գա. նա պատասխանել է այս հարցին
Կրեմլը հաստատում է` Վլադիմիր Պուտինն ու Ռոբերտ Քոչարյանը խոսել են հեռախոսով
թեգերը:
Վլադիմիր Պուտին, Մոսկվա, Նիկոլ Փաշինյան, Ռուսաստան, Հայաստան

Գլխավոր թեմաներ