ԵՐԵՎԱՆ, 17 հուլիսի — Sputnik. ԱԺ ՀՀԿ խմբակցության անդամները կարծում են, որ ՀՀ նախագահը հրաժարական չի տա, գրում է ArmLur.am-ը։
ԱԺ ՀՀԿ խմբակցության պատգամավոր Լևոն Մարտիրոսյանը նշեց, որ բնականաբար, հրաժարական չի լինի:
«Ես սա գնահատում եմ, որպես արկածախնդրություն, որը ոչ մի տեղ չտանող գործողություն է: Չգիտեմ այդ մարդիկ ինչ են մտածում այդպիսի քայլերի դիմելով, ամեն դեպքում չափազանց բացասական իրադարձություն է: Հիմա ամենաճիշտ մոտեցումը կլինի համապատասխան մարմիններին թույլ տալ իրենց աշխատանքը կատարել, բանակցել այդ արկածախնդիրերի հետ, որպեսզի մարդկային զոհեր չլինեն և խաղաղ ճանապարհով այս հարցը լուծվի: Բայց որ այդ մարդիկ պետք է պատասխանատվության ենթարկվեն այստեղ երկու կարծիք չկա»,- ասաց Մարտիրոսյանը։
ԱԺ ՀՀԿ խմբակցության անդամ Սուքիաս Ավետիսյանն ընդգծեց, որ Սերժ Սարգսյանին ժողովուրդն է ձայն տվել, և իշխանությունը ժողովրդի կողմից ձեւավորված իշանություն է:
«Եթե 2017-ին այդ ժողովուրդը այլ քաղաքական ուժի կընտրի իրեն որպես իշխանություն, թող այդ ժամանակ ընտրի: Հիմա զինված մի քանի հոգի պետք է ինչ-որ բա՞ն անեն, պարտադիր պետք է բռնությու՞ն գործադրեն, անմեղ մարդի՞կ տուժեն այդ բռնության արդյունքում, ասեն իշխանությու՞ն տվեք: Իշխանությունը հո՞ խաղալիք չէ` մեկը մյուսին` ով երբ ուզի հանձնի, վերցնի: Դատապարտելի իրադարձություն է: Ես չեմ կարծում, որ բռնության տարբերակը ամենաճիշտ տարբերակն է ինչ-որ հարցեր լուծելու համար: Առաջին հերթին, ովքեր ձեռնարկել են այդ բռնությունը, խոհեմ գտնվեն, որպեսզի մարդիկ չտուժվեն, փորձեն բանակցությունների արդյունքում այդ խնդիրը լուծել: Այդ ժամանակները անցել են, որ բռնությունով հարցեր լուծվի»,- նշեց Ավետիսյանը:
ՀՀ ԱԺ ՀՀԿ խմբակցության պատգամավոր Կարեն Ավագյանն էլ նշեց, որ իրադարձությունների հետ կապված մեկնաբանություն կա, և ինքն ուրիշ բան չունի ասելու:
Հրատարակությունը նշում է, որ Հանրապետական կուսակցության մամուլի խոսնակ Էդուարդ Շարմազանովի և ՀՀԿ խմբակցության ղեկավար Վահրամ Բաղդասարյանի հետ դեռևս հնարավոր չի եղել կապ հաստատել:
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։
Ազգային անվտանգության աշխատակիցները փորձում է բանակցություններ վարել ոստիկանության շենքը գրավողների հետ։ Դեպքի վայրում են ՀՀ ոստիկանության և ԱԱԾ բարձրաստիճան պաշտոնյաները։ Մեկ ոստիկան զոհվել է, ևս երկուսը՝ վիրավորվել:
