ԵՐԵՎԱՆ, 12 հուլիսի — Sputnik. Հուլիսի 11-ին, ժամը 21:30-ին ՃՏՊ է տեղի ունեցել Գյումրի քաղաքի Վազգեն Սարգսյան փողոցում: «Օպել» մակնիշի 15 xx 550 պետհամարանիշերով ավտոմեքենան վրաերթի է ենթարկել Գյումրի քաղաքի բնակիչներ` 1994 թվականին ծնված Արփինե Մանուկյանին և 1984 թվականին ծնված Մելսիկ Ղազարյանին:
Մելսիկ Ղազարյանը տեղում մահացել է, իսկ Արփինե Մանուկյանին տեղափոխել են Գյումրի բժշկական կենտրոն: Ինչպես Sputnik Արմենիային տեղեկացրին բժշկական կենտրոնից, կնոջ առողջական վիճակը կենտրոն տեղափոխելիս ծայրահեղ ծանր է եղել, վնասվածքներն էլ` կյանքի հետ անհամատեղելի: Հիվանդանոցում Արփինե Մանուկյանն, այդպես էլ գիտակցության չգալով, մահացել է: Ըստ տեղեկությունների` տուժածներն ամուսիններ են եղել:
«Օպելի» վարորդը 35-ամյա տղամարդ է: Նա այժմ գտնվում է ոստիկանական բաժանմունքում: Փաստի առթիվ քննչական վարչությունում հարուցվել է քրեական գործ ՀՀ Քրեական օրենսգրքի 242 հոդվածի 2-րդ մասի հատկանիշներով (ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ):
