ԵՐԵՎԱՆ, 23 սեպտեմբերի — Sputnik. Մեղրի քաղաքում տեղի ունեցած դանակահարության հետևանքով երեք քաղաքացի են տուժել, հայտնում է ՀՀ ոստիկանության մամուլի ծառայությունը։
Ավելի վաղ ԶԼՄ-ներում տեղեկություն էր տարածվել, որ սեպտեմբերի 22-ի գիշերը Մեղրի քաղաքի հսկիչ անցակետի մոտ դանակահարություն է տեղի ունեցել, կասկածյալն ինքնակամ եկել է ոստիկանություն։ Տուժած անձանց տեղափոխել են հիվանդանոց։
«Կեսօրից հետո ահազանգ էր ստացվել այն մասին, որ Մեղրիում դանակի հարվածներ ստանալու հետևանքով ծակած-կտրած վնասվածքներով տուժածներ կան», — Sputnik Արմենիային ասաց ՀՀ Ոստիկանության ԶԼՄ-ների հետ կապի, վերլուծության և լրատվության կապի բաժնի պետ Էդգար Ջանոյանը։
Նրա խոսքով, կասկածյալի ինքնությունը պարզվել է, քննություն է տարվում։