ԵՐԵՎԱՆ, 16 դեկտեմբերի — Sputnik. Դեկտեմբերի 15-ին, ժամը 19:30-ի սահմաններում Ոստիկանության Երևան քաղաքի վարչության օպերատիվ կառավարման կենտրոն ահազանգ է ստացվել, որ Արմենակյան փողոցում գտնվող «CPS» բենզալցակայանում կրակոցներ են հնչել: Այս մասին տեղեկացնում է Shamshyan.com-ը:
Բենզալցակայանի գրասենյակային հատվածում տեղազննության ընթացքում հայտնաբերվել են կրակոցի հետքեր: Ոստիկաններն ու քննիչները պարզել են, որ մեկ անձ աջ ոտքի հրազենային վնասվածքով տեղափոխվել է «Էրեբունի» բժշկական կենտրոն:
Կայքի տեղեկություններով՝ հրազենային վնասվածք ստացածը բենզալցակայանի աշխատակիցն է:
Ոստիկանությունն ու քննչական բաժինը պարզում են վիրավորի ինքնությունը: Ձեռնարկվում են անհրաժեշտ օպերատիվ-հետախուզական և քննչական համատեղ գործողություններ՝ հանցագործությունը բացահայտելու ուղղությամբ: