ԵՐԵՎԱՆ, 18 դեկտեմբերի — Sputnik. Երեկ՝ դեկտեմբերի 17-ին, շմոլ գազից թունավորման 2 դեպք է գրանցվել հանրապետությունում։ Այս մասին տեղեկացնում է Shamshyan.com-ը։
Ժամը 05։40-ի սահմաններում «Սուրբ Գրիգոր Լուսավորիչ» բժշկական կենտրոն «շմոլ գազի թունավորում» ախտորոշմամբ բուժօգնության են դիմել Ջրվեժ գյուղի բնակիչներ՝ 44-ամյա Երջանիկ Տիտոյանը, 15-ամյա Ելենա Տիտոյանը, 14-ամյա Միլեն Տիտոյանը, 39-ամյա Լուսինե Սահակյանը, 57-ամյա Էլեն Տիտոյանը և 5-ամյա Գոռ Տիտոյանը։
Պարզվել է, որ նույն օրը, ժամը 04։00-ի սահմաններում նշված անձինք թունավորվել են Ջրվեժ գյուղի 6-րդ փողոցի 5-րդ տան գազի կաթսայի արտահոսքից, ինչի հետևանքով է վատացել է նրանց ինքնազգացողությունը։ Տուժածներին տեղափոխել են «Սուրբ Գրիգոր Լուսավորիչ» բժշկական կենտրոն, որտեղ էլ բժիշկների օպերատիվ գործողությունների արդյունքում հնարավոր է եղել փրկել նրանց։
Փաստի առթիվ Ոստիկանության Կոտայքի բաժնում հետաքննություն է սկսվել։
Երեկ՝ դեկտեմբերի 17-ին, մեկ այլ թունավորում էլ տեղի է ունեցել Գեղարքունիքի մարզում։ Ժամը 05։20-ի սահմաններում Սևանի բժշկական կենտրոն են տեղափոխվել Սևան քաղաքի Սունդուկյան փողոցի բնակիչներ՝ 34-ամյա Բաղիշ Հարությունյանը, 23-ամյա Մարո Ջավադյանը, 31-ամյա Լուսինե Հայրապետյանը, 11-ամյա Սևակ Հարությունյանը և 10-ամյա Վահե Հարությունյանը։
Պարզվել է, որ նույն օրը, ժամը 02։30-ի սահմաններում նշված անձինք թունավորվել են իրենց տանը գազօջախի փականը անզգուշաբար բաց թողնելու հետևանքով արտանետված գազից։ Փաստի առթիվ Ոստիկանության Սևանի բաժնի հետաքննչական բաժանմունքում նյութեր են նախապատրաստվում։ Երկու դեպքերով էլ նշանակվել են դատաբժշկական փորձաքննություններ։