ԵՐԵՎԱՆ, 13 հունվարի — Sputnik. Այսօր՝ հունվարի 13-ին, խոշոր հրդեհ է բռնկել Լոռու մարզում։ Ժամը 13։00-ի սահմաններում Արտակարգ իրավիճակների նախարարության Փրկարար ծառայության օպերատիվ կառավարման կենտրոնն ահազանգ է ստացել, որ Վանաձոր քաղաքի Տարոն 3 թաղամասի քոթեջներից մեկում հրդեհ է բռնկել և անհրաժեշտ է հրշեջ-փրկարարների օգնությունը։
Ինչպես հայտնում է shamshyan.com-ը, դեպքի վայր է ժամանել Վանաձորի հրշեջ-փրկարարական ջոկատը՝ 2 մարտական հաշվարկով, որից հետո միացել է Սպիտակի հրշեջ-փրկարարական ջոկատի խումբը։
Հրշեջները քաղաքացիների, տեղի ոստիկանության ծառայողների հետ համատեղ մարել են 2 բնակելի քոթեջներում առաջացած հրդեհը՝ մինչ այդ կանխելով կրակի տարածումը։
Ըստ նախնական տեղեկությունների՝ զոհեր և վիրավորներ չկան։
Նշենք, որ այսօր առավոտյան հրդեհ էր բռնկել նաև Վանաձորի Ներսիսյան փակուղու թիվ 3-րդ շենքի բնակարաններից մեկում։ Ամբողջությամբ այրվել էր բնակարանը՝ գույքով:
Հրշեջ-փրկարարները հյուրասենյակում հայտնաբերել էին Ա. Մ.-ի այրված դին:
