ԵՐԵՎԱՆ, 19 փետրվարի — Sputnik. Ոստիկանության Կոտայքի բաժնի հետաքննչական բաժանմունքում նյութեր են նախապատրաստվում փետրվարի 1-ին «Աբովյան» բժշկական կենտրոնից Ոստիկանության Կոտայքի բաժին ստացված ահազանգի փաստով։ Այս մասին հայտնում է shamshyan.com-ը։
Ժամը 12։30-ի սահմաններում նշված կենտրոնից Ոստիկանություն հայտնել են, որ «ձախ վերին և վերին հոնքային շրջանի սալջարդ վերք» ախտորոշմամբ իրենց մոտ է տեղափոխվել մի քաղաքացի։
Ոստիկանները պարզել են, որ հիվանդանոց տեղափոխվածը Կապուտան գյուղի 3-րդ փողոցի բնակիչ 26-ամյա Վանիկ Ենոքյանն է, որին ծեծել են համագյուղացիները։
Ենոքյանին ծեծի ենթարկելու կասկածանքով Ոստիկանության Կոտայքի բաժին են բերման ենթարկվել Կապուտան գյուղի բնակիչներ՝ 22-ամյա Արամայիս Պետրոսյանը և 49-ամյա Արմեն Պետրոսյանը։
Պարզվել է, որ վիճաբանությունը տեղի է ունեցել Կապուտան գյուղի կենտրոնական փողոցում գտնվող հուշարձանի մոտ։ Պետրոսյանները ոչ միայն ծեծել են Ենոքյանին, այլև վնասել են նրան պատկանող Mitsubishi մակնիշի 34 ՍD 552 համարանիշի ավտոմեքենան՝ կոտրելով կողային ու դիմային ապակիներն ու վարորդի դռան եզրային հատվածը։
Գյուղացիները հայտնել են, որ Ենոքյանը Ոստիկանության աշխատակից է, գյուղում հարգանքով են վերաբերվում նրան, իսկ Պետրոսյանները հայր ու որդի են, որոնց գյուղում ավելի շատ ճանաչում են որպես կռվարարների։
«Նրանք, իմանալով, որ Վ. Ենոքյանը կատարվածի մասին տեղեկացրել է Ոստիկանությանը, իրենք էլ իրենց հերթին դիմել են Ոստիկանություն և հայտնել, որ իբր Ենոքյանը իրենց աղջկան բռնաբարել է։ Ամբողջ գյուղը գիտի, որ հայրն ու որդին հնարելեն այդ վարկածը, նման բան չկա։ Նրանք փորձում են այդ եղանակով ջրից չոր դուրս գալ։ Վանիկն ու նրանց աղջիկը ծանոթ են եղել, բայց այդ տեղեկությունը նրանց զառանցանքներն են»,- ասել են գյուղացիները։
Կայքի տեղեկություններով՝ այս դեպքով նույնպես առանձին նյութեր են նախապատրաստվում և նշանակվել են մի շարք փորձաքննություններ Իսկ աղջկան տրվել է դատաբժշկի ուղեգիր։
