ԵՐԵՎԱՆ, 19 նոյեմբերի — Sputnik. Երևանում տեղի ունեցած շղթայական ավտովթարի հետևանքով կան տուժածներ, նրանցից մեկի վիճակը ծայրահեղ ծանր է։ Ինչպես տեղեկացնում է ՀՀ ԱԻՆ մամուլի ծառայությունը, այսօր` նոյեմբերի 19-ին, ժամը 00:54-ի «911» ծառայությանը տեղեկություն է ստացվել, որ Երևան քաղաքի Բագրատունյաց պողոտայում` «Լճափ» բենզալցակայանի մոտակայքում, տեղի է ունեցել ՃՏՊ. կան տուժածներ. անհրաժեշտ է փրկարարների օգնությունը:
Դեպքի վայր է մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ:
Պարզվել է, որ բախվել են «ԳԱԶել» (վարորդը՝ Ա. Պ., 1969 թ.), «Volkswagen Passat» (վարորդը` Ա. Ս., 1990 թ.), «Mercedes E» (վարորդը՝ Թ. Հ., 1976 թ.) և ճամփեզրին կայանած «Ford Transit» մակնիշերի (վարորդը՝ Ա. Խ., 1933 թ.) ավտոմեքենաները:
Մինչ փրկարարների կանչի վայր հասնելը, «ԳԱԶել» մակնիշի ավտոմեքենայի վարորդ Ա.Պ.-ն և ուղևոր Կ. Պ.-ն (1999 թ.) հոսպիտալացվել են Էրեբունի ԲԿ, որտեղ ստանալով համապատասխան բուժօգնություն՝ դուրս են գրվել, մյուս ուղևորները` Կ. Պ.-ն (1999 թ.) և Գ. Պ.-ն (2017 թ.) հոսպիտալացվել են «Սրբ.Աստվածամայր ԲԿ», որտեղ բժիշկները տուժածների առողջական վիճակը գնահատել են բավարար:
Աստղիկ ԲԿ հոսպիտալացված քաղաքացիների առողջական վիճակը բժիշկները գնահատել են ծայրահեղ ծանր։ Նրանցից մեկը «Volkswagen Passat» մակնիշի ավտոմեքենայի վարորդն է, մյուսը` ուղևորը։
Փրկարարները փակել են ավտոմեքենաների գազի բալոնների փականները և հոսանքազրկել ավտոմեքենաները:
Ժամը 01:02-ից մինչև 01:53-ը փրկարարները տեղում իրականացրել են հերթապահություն` մինչ «Volkswagen Passat» մակնիշի ավտոմեքենայի գազի բալոնի պարունակության պարպումը և իրականացրել են ճանապարհի լվացման աշխատանքներ:
