ԵՐԵՎԱՆ, 9 հունվարի — Sputnik. Կարագանդայում ռեստորանի մոտ խմբակային ծեծկռտուքի գործով կասկածյալ Նարեկ Գուրուրյանին ձերբակալել են Ռուսաստանում։ Այս մասին հայտնում է Ղազախստանի Ներքին գործերի նախարարությունը (ՆԳՆ)։
ՀՀ քաղաքացի Նարեկ Գուրուրյանին ձերբակալել են Օմսկի մարզում։
«ՆԳՆ քրեական ոստիկանության աշխատակիցներն այսօր Ռուսաստանի իրավապահ մարմինների հետ փոխգործակցության արդյունքում Օմսկի մարզի տարածքում ձերբակալել են հունվարի 1-ի գիշերը Կարագանդայում խուլիգանության և սպանության մեջ կասկածվող ՀՀ քաղաքացի Ն. Գուրուրյանին», – գրված է հայտարարության մեջ։
Այժմ որոշվում է Գուրուրյանին Ղազախստանին արտահանձնելու հարցը։
Նարեկ Գուրուրյանի նկատմամբ միջազգային հետախուզում էր հայտարարվել, Կարագանդայում Ամանորի գիշերը տեղի ունեցած խմբակային ծեծկռտուքից հետո։ Նրան հաջողվել էր հունվարի 1-ին, ժամը 22.00 –ին Պավլոդարի մարզի պահակետով հատել ղազախա–ռուսական սահմանը։ Նա տեսաուղերձ էր հրապարակել` նշելով, որ պատրաստ է հանձնվել Ղազախստանի իշխանություններին։ Նարեկ Գուրուրյանը վստահեցրել էր, որ սպանության հետ առնչություն չունի։
