ԵՐԵՎԱՆ, 15 հունվարի — Sputnik. Լոռու մարզում սպանել են 41–ամյա տղամարդու։ Ինչպես տեղեկացնում է Shamshyan.com-ը, այսօր՝ հունվարի 15-ին, ժամը 13։00-ի սահմաններում Սպիտակի բժշկական կենտրոնից Ոստիկանության Սպիտակի բաժին ահազանգ է ստացվել, որ հրազենային վնասվածքներով իրենց մոտ է տեղափոխվել մի քաղաքացի, ով գիտակցության չգալով՝ մահացել է։
Դեպքի վայր մեկնած ոստիկանները պարզել են, որ մահացածը Սպիտակ քաղաքի Թորոսյան փողոցի 42 տնակի բնակիչ, 41-ամյա Գարուշ Մարությանն էր։
Փաստի առթիվ Սպիտակի քննչական բաժնում հարուցվել է քրեական գործ՝ ՀՀ քր. օր-ի 104 հոդվածի 1-ին մասի և 235 հոդվածի 1-ին մասի հատկանիշներով։ Ֆոտոլրագրողի հետ զրույցում հիվանդանոցի մոտ հավաքված մի քանի քաղաքացիներ ասում էին, որ սպանվածը նախկինում եղել է մի քանի անգամ դատապարտված։
Կրակոցները հնչել են Սպիտակ քաղաքի Ալեք Մանուկյան 19 հասցեում գործող «Սիլ Ինշուրանս» ապահովագրական ընկերության ներսում, որտեղ այս պահին դեպքի վայրի զննություն են կատարում քննիչներն ու Ոստիկանության փորձաքրեագետները։ Հայտնաբերվել է կրակված 1 գնդակ։ Գագիկ Շամշյանի տվյալներով` պարզվել է, որ սպանվածի ականջի մեկը կտրված է եղել, իսկ մյուսը` կիսակտրված։
