ԵՐԵՎԱՆ, 23 հունվարի — Sputnik. Մանուկ Աբեղյանի անվան դպրոցում սովորող 4 երեխայի տեղափոխել են հիվանդանոց։ Այս մասին հայտնում է shamshyan.com–ը։
Երևանի թիվ 1 համալսարանական հիվանդանոցից ոստիկանությանը հայտնել են, որ հունվարի 22-ին, 14։ 40-ին մարմնական վնասվածքներով իրենց մոտ են տեղափոխվել 17-ամյա Դավիթ Ո.-ն՝ աջ ականջի վերին հատվածի քերծվածքներով, 16-ամյա Դավիթ Տ.-ն՝ աջ քունքային շրջանի պատռած վերքով, 17-ամյա Ռոբերտ Ա.-ն՝ ձախ վերհոնքային հատվածի պատռված արյունահոսող վերքով և 17-ամյա Արտաշես Ս.-ն՝ գլխի գագաթային շրջանի պատռած վերքով ու սալջարդով։ Բոլորը Երևանի բնակիչներ են։
Ոստիկանները պարզել են, որ անչափահասները սովորում են Երևանի Մանուկ Աբեղյանի անվան դպրոցում։
Նախնական տվյալներով` նրանք վիճաբանել են Չայկովսկու փողոցում բնակվող 18-ամյա Վահագն Խ.-ի, 18-ամյա Ժիրայր Փ.-ի և 19-ամյա Ռազմիկ Գ.-ի հետ։
Ոստիկանությունն էլ հայտնում է, որ պատանիները նախապես իրավապահներին ասել են, թե վնասվածքները ստացել են «Վերնիսաժ» տոնավաճառում վազելու և ընկնելու հետևանքով: Բայց օպերատիվ միջոցառումների արդյունքում պարզվել է, որ դպրոցականները ձեռքերով և ոտքերով փոխադարձ հարվածներ են հասցրել Չայկովսկու փողոցում բնակվող պատանիներին։ Նրանցից մեկին արդեն տարել են ոստիկանություն։
Ձեռնարկվում են միջոցառումներ միջադեպի բոլոր հանգամանքները պարզելու և մյուս մասնակիցներին հայտնաբերելու ուղղությամբ: