ԵՐԵՎԱՆ, 4 փետրվարի — Sputnik. Փետրվարի 3-ին Նազարեթյան եղբայրներն իրենց համագյուղացու հետ այցելել են Նոր Արթիկ համայնքում գտնվող ծանոթի տուն, այնտեղ ոգելից խմիչք են օգտագործել։ Իսկ վերադարձի ճանապարհին ավագ եղբայրը դանակահարել ու սպանել է կրտսերին:
ՀՀ Քննչական կոմիտեն նոր մանրամասներ է հրապարակել այս ողբերգական սպանությունից։
Քննչական գործողությունների արդյունքում պարզվել է, որ ծանոթի տնից իրենց տուն ուղևորվելու ճանապարհին եղբայրները վիճել են ավտոմեքենան արագ վարելու և իրենց ծանոթի տանը ունեցած անախորժ խոսակցության թեմայի շուրջ։
Այդ վիճաբանության ընթացքում էլ 48-ամյա եղբայրը` Ժիրայր Նազարեթյանը, դանակի 8 հարված է հասցրել եղբորը` Ղևոնդ Նազարեթյանին։
Այնուհետև դանակահարված եղբորը հիվանդանոց հասցնելու փոխարեն տեղափոխել է Շիրակի մարզի Բագրավան գյուղում գտնվող իրենց մորաքրոջ տուն, որտեղ եղբայրը ստացած վնասվածքներից մահացել է:
Ինչպես հայտնում է Քննչական կոմիտեն, 45-ամյա եղբորը սպանելու կասկածանքով ձերբակալվել է նախկինում չորս անգամ դատապարտված, Արագածոտնի մարզի 48-ամյա բնակիչը և տվել ինքնախոստովանական ցուցմունք:
Հիշեցնենք` 2019 թվականի փետրվարի 3-ին՝ ժամը 21:30-ին, ոստիկանության Թալինի բաժնից հաղորդում է ստացվել, որ Արագածոտնի մարզի Նոր Արթիկ համայնքի վարչական տարածքում՝ «Վազ 21-06» մակնիշի ավտոմեքենայում, երկու եղբայրների միջև ծագած վիճաբանության ժամանակ նույն մարզի 48-ամյա բնակիչը դանակով հարվածներ է հասցրել 45-ամյա եղբորը:
Դեպքի առթիվ Թալինի քննչական բաժնում հարուցվել է քրեական գործ` սպանության` Քրեական օրենսգրքի 104-րդ հոդվածի 1-ին մասի հատկանիշներով: