ԵՐԵՎԱՆ, 26 ապրիլի — Sputnik. Դատարանը Վորոնեժի մարզի բնակչուհուն պայմանական ազատազրկման է դատապարտել երեք և երկու տարեկան դուստրերի մահվան պատճառ դառնալու մեղադրանքով։ Այս մասին հայտնում է ՌԻԱ Նովոստին` հղում անելով ՌԴ Քննչական կոմիտեի Քննչական վարչությանը։
Երեխաների դիակները հայտնաբերել են նոյեմբերի 16–ին «Պոդվորիե» ԲԲԸ–ի ֆերմայի բնակելի տարածքում։ Քննության վարկածով` 2018 թվականի նոյեմբերի 16–ին 27–ամյա կինը, որն ամուսնու հետ Հայաստանից տեղափոխվել է Վորոնեժի մարզ ու բնակվել ֆերմայում, տնից գնացել է ու մենակ թողել երեխաներին։ Այդ սենյակում վառարան է եղել, որի կրակից այրվել է սպիտակեղենը։ Աղջիկները մահացել են շմոլ գազից թունավորվելու հետևանքով։
Մոր հանդեպ քրեական գործ է հարուցվել անզգուշությամբ երկու անձանց մահ պատճառելու հոդվածով։
«Դատարանը որոշել է մեկ տարվա պայմանական ազատազրկման դատապարտել կնոջը` վեց ամիս փորձաշրջանով», – նշվում է հաղորդագրության մեջ։
Մարզի դատախազության տվյալներով` բնակելի տարածքում ինքնաշեն վառարան է դրված եղել։
Աղջիկների ծնողները Հայաստանի քաղաքացիներ են։ Նրանք 2018 թվականի ապրիլին են Ռուսաստան մեկնել ու միգրացիոն հաշվառման կանգնել։
