ԵՐԵՎԱՆ, 7 մայիսի – Sputnik. Երևանում ավազակային հարձակում է տեղի ունեցել։ Sputnik Արմենիային այս մասին հայտնեցին ոստիկանության մամուլի ծառայությունից։
Այսօր՝ մայիսի 7-ին, ժամը 05։20-ի սահմանում բժշկական դիմակով և ձեռնոցներով, դանակով և նռնակի նմանվող առարկայով, մի քաղաքացի մտել է Արաբկիր վարչական շրջանի Կոմիտասի պողոտայում գործող «ՍԱՍ» սուպերմարկետ և տարադրամի փոխանակման կետի աշխատակցից պահանջել է, որ այնտեղ գտնվող ամբողջ գումարը փոխանցի իրեն։
Տարադրամի փոխանակման կետի աշխատակիցն ընդդիմացել է, և դիմակավորված անձը, առանց որևէ բան հափշտակելու, փախել է։
Դեպքի վայր են ժամանել ոստիկաններն ու քննիչները։
Ոստիկանությունն ու քննչական բաժինը ձեռնարկում են անհրաժեշտ օպերատիվ-հետախուզական և քննչական համատեղ գործողություններ՝ հանցագործությունը բացահայտելու, կատարողին հայտնաբերելու ուղղությամբ։
