ԵՐԵՎԱՆ, 5 սեպտեմբերի – Sputnik. Երևան-Երասխ ավտոճանապարհին վթար է տեղի ունեցել, որի հետևանքով երկու զինծառայող է տուժել։ Տեղեկությունը Sputnik Արմենիայի հետ զրույցում հաստատեց ՀՀ ՊՆ խոսնակ Շուշան Ստեփանյանը։
«Երկուսն էլ հետազոտվել են, աննշան, թեթև քերծվածքներ են ստացել: Ոչ մեկի առողջությանը, առավել ևս կյանքին որևէ վտանգ չի սպառնում»,- ասաց նա:
Վթարը տեղի է ունեցել այսօր` ժամը 11:17-ին, Երևան–Երասխ ավտոճանապարհի 28-րդ կմ-ում։
Ինչպես հայտնում է ՀՀ արտակարգ իրավիճակների նախարարության պաշտոնական կայքը, բախվել են 56-ամյա Արա Կ –ի վարած «BMW», 34-ամյա Վաղինակ Մ–ի վարած «Mercedes-Benz E-Class» և 25-ամյա Հայկ Հ․–ի վարած «ԳԱԶ-3308» մակնիշների ավտոմեքենաները։
Վթարի հետևանքով «BMW» մակնիշի ավտոմեքենան շրջվել է ճանապարհի բաժանարար գոտու երկաթե արգելապատնեշների վրա, իսկ «Mercedes-Benz»–ը դուրս է եկել ճանապարհի երթևեկելի հատվածից և հայտնվել դաշտամիջյան տարածքում:
Ողբերգական ավտովթար Կոտայքում. կան զոհեր և վիրավորներ
Մինչ փրկարարների՝ կանչի վայր հասնելը «BMW» մակնիշի ավտոմեքենայի ուղևոր, 31-ամյա Անուշ Կ․-ն, «ԳԱԶ-3308» մակնիշի ավտոմեքենայի վարորդ Հայկ Հ․-ն և 31-ամյա ուղևոր Ռուբեն Վ․-ն հոսպիտալացվել են Արտաշատի ԲԿ։ Ավելի ուշ Անուշ Կ․-ն տեղափոխվել է Երևանի «Էրեբունի» ԲԿ, իսկ Հայկ Հ․-ն և Ռուբեն Վ․-ն ՝ Կենտրոնական կլինիկական զինվորական հոսպիտալ։
Մահվան ելքով վրաերթ Արմավիր քաղաքում․ հետիոտնը տեղում մահացել է
