ԵՐԵՎԱՆ, 11 հուլիսի – Sputnik. Այսօր, ժամը 13:22-ին Գեղարքունիքի մարզային ճգնաժամային կառավարման կենտրոն տեղեկություն է ստացվել, որ հատուկ ջրափրկարարական ջոկատի ջրասուզակները Սևան քաղաքի 2-րդ հանրային լողափում հերթապահություն իրականացնելիս նկատել են շրջված հեծանվանավակ։
Ինչպես հայտնում է արտակարգ իրավիճակների նախարարությունը, ջրասուզակները հեծանվանավակով շրջված քաղաքացիներին դուրս են բերել ափ։
Փրկարարների շնորհիվ փրկված քաղաքացիները 27 տարեկան երիտասարդներ են` 1994թ–ին ծնված Ղ․ Խ․-ն և Վ․ Գ․-ն։
Հիշեցնենք` Սևանի հանրային 8 լողափերից 3-ի պաշտոնական բացումը տեղի է ունեցել երեկ` հուլիսի 10-ին։ Փրկարար ծառայության աշխատակիցներից բացի այս տարի հանգստացողների անվտանգությանը կհետևեն նաև դրոններով:
ՀՀ ԱԻՆ փրկարար ծառայության Գեղարքունիքի մարզային փրկարարական վարչության հատուկ ջրափրկարարական ջոկատի հրամանատար Արմեն Ճզմաչյանը լրագրողներին ասել էր, որ դրոնները կարող են մինչև հինգ կիլոգրամ քաշով առարկաներ տեղափոխել: Այսպիսով` շատ կարճ ժամանակում խեղդվողին կարելի է փրկարարական բաճկոն, շրջանակ և այլ իրեր հասցնել։
«Սևան ազգային պարկ» ՊՈԱԿ-ի փոխտնօրեն Արման Աբելյանը հայտնել էր, որ լողափերը բաց կլինեն մինչև ժամը 20:00-ը, որից հետո տարածքներում մաքրման աշխատանքներ կիրականացվեն:
