Պատգամավոր. Հայաստանը և ԼՂՀ–ն անվտանգության առումով մեկ տարածք են

ԵՐԵՎԱՆ, 1 հոկտեմբերի– Sputnik. Հայաստանը և Արցախն անվտանգության ապահովման դիրքերից մեկ տարածք են ներկայացնում, հինգշաբթի ասաց պատգամավոր, «Եվրոպական ինտեգրացիա» հասարակական կազմակերպության ղեկավար Կարեն Բեքարյանը Sputnik Արմենիա միջազգային մամուլի կենտրոնում` մեկնաբանելով Հայաստանի նախագահի ելույթը ՄԱԿ Գլխավոր վեհաժողովում։ Հայաստանի նախագահ Սերժ Սարգսյանը ՄԱԿ–ի ԳՎ  70–րդ նստաշրջանում հայտարարել է, որ Ադրբեջանի ագրեսիվ քաղաքականության շարունակության դեպքում հայկական կողմը կգնա անհրաժեշտ իրավական և ռազմաքաղաքական քայլերի` Հայաստանի և ԼՂՀ–ի անվտանգությունն ապահովելու համար։

«Հայաստանին ոչինչ չի մնում Ադրբեջանի ցինիկ և հանդուգն գործողություններին պատասխանելուց բացի։ Ցանկացած զիջում, մարդասիրության ցանկացած ժեստ, սադրանքներին պատասխանի բացակայությունն այնտեղ ընդունվում է որպես թուլություն, որին հետևում են ավելի արմատական քայլեր։ Այդ պայմաններում Հայաստանին մնում է միայն հայտարարել է, որ նա եղել և մնում է Ղարաբաղի անվտանգության երաշխավորը, և որ անվտանգության տեսնակյունից դա մեկ տարածք է»,– ասաց Բեքարյանը։

Պատգամավորի խոսքով, եթե համաշխարհային հանրությունը ոչինչ չի անում Ադրբեջանին նման քայլերից ետ պահելու համար, ապա պետք է գործի Հայաստանը։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ.–ի դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Հանրաքվեին հաջորդեցին Ադրբեջանի ձեռնարկած ռազմական լայնածավալ գործողությունները, որոնց հետևանքով Ադրբեջանը կորցրեց վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ.–ի մայիսի 12-ին զինադադարի վերաբերյալ եռակողմ համաձայնագիր կնքելուց հետո հակամարտության գոտում դադարեցին ռազմական գործողությունները, որոնց հետևանքով երկու կողմն, ընդհանուր առմամբ, շուրջ 25-30 հազար զոհ ունեցավ, իսկ մոտ մեկ միլիոն մարդ էլ ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան: