11:18 22 օգոստոսի 2017
Ուղիղ եթեր
газеты сми

Իրանական մամուլը գերապատվությունը տալիս է հայկական աղբյուրներին

© infoglaz
Արցախ
Ստանալ կարճ հղումը
86 0 0

Ղարաբաղում ստեղծված բարդ իրավիճակի պայմաններում մեր հարևան Իրանի Իսլամական հանրապետության մամուլը փորձում է հնարավորինս անկողմնակալություն պահպանել՝ աղբյուրների ընտրության հարցում գերապատվությունը տալով հայկական պաշտոնական լրահոսին: Նման եզրակացության են հանգել իրանագետները՝ հետևելով իրանական լրատվամիջոցների աշխատանքին

ԵՐԵՎԱՆ, 3 ապրիլի – Sputnik. Իրանագետ Ահարոն Վարդանյանը Sputnik Արմենիա ռադիոկայանի եթերում հայտնեց, որ Իրանի լրատվամիջոցներին հետևելով` եզրակացրել է, որ հրապարակումներում գրեթե համատարած հղում է արվում Հայաստանի Հանրապետության ու Լեռնային Ղարաբաղի պաշտոնական լրատվությանը:

«Օրինակ` այդպես էր վարվել իրանական իսլամական հեղափոխության պահապանների կորպուսի պաշտոնական կայքը։ Երկու հարյուր ադրբեջանցիների զոհերի մասին լուրում հղում էր կատարել Ղարաբաղի Պաշտոնական Բանակին»,- ասում է Ահարոն Վարդանյանը՝ չհերքելով, որ կան նաև ադրբեջանական լրատվամիջոցներին հղում կատարող «միջանցքային լրատվականներ»:

«Այդ պարագայում միանգամից պարզ է դառնում, որ նրանք սնվում են հենց ադրբեջանական ֆինանսական աղբյուրներից, և այդ հարցում, համոզված եմ, իրանական կողմը պետք է լուրջ ուշադրություն դարձնի լրատվամիջոցներին»,- ասում է իրանագետը:

Ահարոն Վարդանյանի խոսքով` ԻՌՄԱ պետական լրատվական գործակալությունն էլ իր հրապարակման մեջ անկողմնակալություն պահպանելով` և՛ հայկական, և՛ ադրբեջանական տեղեկատվություն է ներկայացրել. վերնագրում ներկայացրել է հայկական կողմի տարբերակը, իսկ ադրբեջանական լրահոսը ներկայացրել է նյութի վերջին պարբերությունում:

«Ամեն դեպքում պետք է նշել, որ իրանական կողմը փորձում է հնարավորին չափ օբյեկտիվություն պահպանել, սակայն միևնույն է, զգացվում է, թե նախապատվությունն ում է տրվում»,- ասաց նա:

Իրանագետ Ռուդիկ Յարալյանի կարծիքով ևս հայ-ադրբեջանական սահմանային լարվածության վերաբերյալ իրանական ԶԼՄ-ներն, ընդհանուր առմամբ, անկողմնակալ տեղեկատվություն են հրապարակում: Եվ միայն որոշ հակահայկական համացանցային ռեսուրսներն են այս օրերին աննախադեպ ակտիվություն դրսևորում:

«Իրենց աչառու հրապարակումներում դրսևորում են արհեստավարժության և տարրական գիտելիքի լրջագույն պակաս,- ասում է իրանագետը,- օրինակ՝ կարող են չպատկերացնել Հայաստանի աշխարհագրական դիրքը՝ որպես հարավկովկասյան հանրապետություն կամ որ Նախիջևանը կպած չէ Ադրբեջանին»։

Ապրիլի 1-ի լույս 2-ի գիշերը Ադրբեջանը հարձակողական գործողություններ է ձեռնարկել ղարաբաղա–ադրբեջանական շփման գծում, որոնց ընթացքում հրթիռահրետանային գնդակոծության են ենթարկվում ոչ միայն հայկական զինված ուժերի դիրքերը, այլև` խաղաղ բնակավայրերը։ Մարտական գործողությունները շարունակվում են։

 

 

 

Գլխավոր թեմաներ