ԵՐԵՎԱՆ, 11 ապրիլի — Sputnik. Ղարաբաղյան կողմն Ադրբեջանին 13 մարմին է փոխանցել, հայտնեց ԼՂՀ ՊԲ մամուլի խոսնակ Սենոր Հասրաթյանը։
«Մենք հակառակորդին հնարավորություն տվեցինք մեր դիրքերի մոտ գտնվող տարածքից դուրս բերել դիակները։ Ադրբեջանական կողմի զոհերի թիվը տասնյակների է հասնում»,- ասաց Հասրաթյանը։
Ապրիլի 10-ին իրականացվել է զոհվածների մարմինների փոխանակում, որի ընթացքում ղարաբաղյան կողմին է հանձնվել ապրիլի 2-5 Ադրբեջանի կողմից իրականացված լայնածավալ ռազմական ագրեսիայի արդյունքում առաջնագծում զոհված ԼՂՀ պաշտպանության բանակի 18 զինծառայողի մարմին:
Ապրիլի 1-ի լույս 2-ի գիշերը ղարաբաղյան հակամարտության գոտում իրավիճակը սրվել է։ Երևանը հաղորդել է ադրբեջանական կողմի նախահարձակ գործողությունների մասին, միաժամանակ Բաքուն հայտարարել է Հայաստանի ԶՈւ կողմից գնդակոծությունների մասին։ Պաշտոնական հայտարարությունների համաձայն` երկու հակամարտող կողմերը կորուստներ ունեն։ Ապրիլի 5-ին կողմերը պայմանավորվել են ռազմական գործողությունները դադարեցնելու մասին, բայց վերջնական հրադադար չի կնքվել։ Երկու կողմերը հայտարարում են փոխադարձ պայմանավորվածությունները խախտելու մասին, ադրբեջանական կողմը կրակում է նաև Հայաստանի սահմանամերձ գյուղերի ուղղությամբ։