ԵՐԵՎԱՆ, 24 մայիսի — Sputnik. Պրոֆեսիոնալ բռնցքամարտի երկրորդ թեթևագույն քաշային կարգում աշխարհի նախկին բացարձակ չեմպիոն Վիկ Դարչինյանը հայերին կոչ է արել արձակուրդն անցկացնել Արցախում, հայտնում է «Արցախպրեսը»։
Դարչինյանը նշել է, որ շուրջ երկու տասնամյակ Ստեփանակերտում չի եղել և շատ ուրախ է, որ հնարավորություն է ընձեռվել Արցախ այցելել և հաճելի ժամանակ անցկացնել:
«Ինձ ընդունել է Արցախի նախագահը, վարչապետը. շատ ջերմ հանդիպումներ են եղել, շատ շնորհակալ եմ: Պատրաստվում եմ նաև դիրքեր գնալ, հանդիպել մեր զինվորների հետ, քաջալերել նրանց»,- ասաց Դարչինյանը։
Բռնցքամարտիկը հավելել է, որ շատ տպավորված է արցախյան այցելությամբ:
«Իրոք, հրաշք տեղ է, անհնար է չհիանալ Արցախի բնությամբ, տեսարժան վայրերով: Ու քանի որ ամառային արձակուրդների շրջանն է բացվում, ուզում եմ կոչ անել մեր բոլոր հայրենակիցներին` իրենց արձակուրդների մի մասն անպայման անցկացնել Արցախում: Բացի այն, որ լիարժեք կհանգստանան ու հաճույք կստանան, դրանով նաև թշնամուն ցույց կտան, թե ովքեր են Արցախի իրական տերերը»,- ասաց Դարչինյանը:
Այն հարցին, թե մոտակա ժամանակներս կա՞ պլանավորված մենամարտ, Դարչինյանը պատասխանեց, որ հուլիսին աշխարհի չեմպիոնի համար մենամարտ ունի:
«Արցախի այցից հետո մեկնելու եմ ԱՄՆ՝ շարունակելու մենամարտի համար նախապատրաստական պարապմունքները»,- ասել է հայ բռնցքամարտիկը:
Նշենք, որ այս կապակցությամբ Ֆեյսբուք սոցիալական ցանցում հայտնվել է #ԵկԱրցախ հեշթեգը։
