ԵՐԵՎԱՆ, 17 մայիսի — Sputnik. Արցախի պաշպանության նախադրության մամուլի խոսնակ Սենոր Հասրաթյանն Ադրբեջանի հայտարարությանը պատասխանել էիր ֆեյսբուքյան էջում։
«Երեկ ադրբեջանական քարոզչամեքենայի կողմից շրջանառության մեջ դրված հերթական հորինվածքն առ այն, թե իբր հայկական կողմը նպատակ ուներ խոցելու այդ երկրի պաշտպանության նախարարին տեղափոխող ուղղաթիռը, իրեն հատուկ պրիմիտիվությամբ «մեկնաբանեց» նաև Հասանովի (Ադրբեջանի պաշտպանության նախարար — խմբ.) անձնական հետաքրքրությունները սպասարկող ռազմական ագիտպրոպը…»,- գրել է Հասրաթյանը։
Նրա խոսքով` սա անլուրջ և իրականության հետ որևէ կապ չունեցող ապատեղեկատվություն է։
Հասրաթյանը հիշեցրել է, որ նույն ագիտպրոպն ամիսներ առաջ Զաքիրին ներկայացնում էր որպես առաջնային գծում «հայկական դիվերսիոն խմբերի դեմ» գործողություններն անձամբ համակարգողի դերում, որի «լավագույն» դրսևորումներից մեկը, թերևս, ս. թ. փետրվարի 24-ի լույս 25-ի գիշերը Մարտունու պաշտպանական ուղղությամբ նրա ունեցած «փայլուն հաջողությունն» էր:
«Հենց այդ օրն էր, որ նույն Հասանովի անմիջական ղեկավարությամբ մշակված հատուկ նշանակության գործողության արդյունքում ադրբեջանական դիվերսիոն խումբը մարտագծում թողնելով 5 զոհ, ճողոպրեց ելման դիրքեր, իսկ այնուհետև, իր սովորության համաձայն, հայցեց միջազգային կազմակերպությունների միջնորդությունը՝ սեփական դիակները դուրս բերելու համար.»,- գրել է Հասրաթյանը։
Նա իր գրառման վերջում նշել է, որ Հասանովին տեղափոխող ուղղաթիռը խփելու անհրաժեշտություն պարզապես չկա:
