Արցախի հակամարտության համապարփակ կարգավորման համար պայմաններ չկան, ասաց Արցախի նախագահ Բակո Սահակյանը` երկրի խորհրդարանում ելույթի ժամանակ։
Անցումային շրջանի նախագահի ընտրությունները տեղի են ունենում այսօր` հուլիսի 19–ին։ Նախագահը ընտրվում է խորհրդարանի հատուկ նիստի ժամանակ։ Նոր նախագահը կպաշտոնավարի մինչև 2020 թվականը։
«Ադրբեջանը չի հրաժարվել ղարաբաղյան հարցի ուժային լուծումից, ինչի ապացույցն էին ապրիլյան գործողությունները, որոնք ցույց տվեցին, որ Բաքուն փորձում է կայծակնային պատերազմով Արցախը ոչնչացնել», – ասաց Սահակյանը։
Նրա խոսքով` թեև մեզ հաջողվել է հետ մղել թշնամուն, նրանց լուրջ կորուստներ պատճառելով, մի շարք խնդիրներ էլ են բացահայտվել, որոնց ոչնչացման ուղղությամբ հիմա իշխանություններն ակտիվորեն աշխատում են։
«Ղարաբաղյան հակամարտության համապարփակ կարգավորման համար վստահելի պայմաններ չկան», – ասաց Սահակյանը։
Դրա պատճառը, նրա խոսքով, այն է, որ Ադրբեջանը շարունակում է ռևանշիստական քաղաքականություն վարել։
Ընդ որում` Ստեփանակերտը կողմ է բանակցությունների լիարժեք ձևաչափի վերականգմանը` Արցախի մասնակցությամբ։
Նրա կարծիքով` հանրապետության ուժեղացման ու զարգացման հարցը հիմնարար է, դրանից է կախված ողջ հայության ապագան։ Արցախի հզոր զինված ուժերը` պետականության գրավականն է, իսկ մարտունակության բարձրացումը, ժամանակակից տեխնիկայի ապահովումը և առաջնագծի ամրացումը առաջնահերթ է պետության համար։
Սահակյանը նշեց, որ պաշտպանության հարցերն ուղղակիորեն կապ ունեն արտաքին քաղաքականության հարցերի հետ։ Արտաքին քաղաքականության հիմքում բարեկամական կապերի պահպանումն է ինչպես Ռուսաստանի, այնպես էլ ԵՄ–ի ու ԱՄՆ–ի հետ։
Սահակյանը անդրադարձավ նաև աշխատանքներին ու ծրագրերին, որոնք իրականացվել են իր պաշտոնավարման ընթացքում։ Պետական ինստիտուտների կառուցման հարցում կարևորեց այն, որ հաջողվեց ներքաղաքական կայունության հասնել։
Արցախի նախագահի պաշտոնի համար երկու թեկնածու է առաջադրվել. Արցախի ներկա նախագահ Բակո Սահակյանը և «Շարժում – 88» Արցախի ԱԺ խմբակցության ղեկավար Էդուարդ Աղաբեկյանը։
2017-ին ընդունված Սահմանադրությամբ Արցախն անցել է պետական կառավարման նախագահական համակարգի, այսուհետև պետության գլխին կանգնած է նախագահը: Նա ընտրվում է ժողովրդի կողմից՝ ուղղակի ընտրությունների միջոցով, 5 տարի ժամկետով: Նույն անձը չի կարող ավելի քան երկու անգամ անընդմեջ ընտրվել հանրապետության նախագահի պաշտոնում: Համաձայն գործող օրենսդրության՝ ԱՀ նախագահը հանդիսանում է գործադիր իշխանության ղեկավար և զինված ուժերի գերագույն հրամանատար: Նա նշանակում է վարչապետին և հաստատում է կառավարության կազմը:
