ԵՐԵՎԱՆ, 13 փետրվարի — Sputnik. Առաջիկայում ղարաբաղյան հակամարտության կարգավորման բանակցություններում առաջխաղացում չի լինի։ Այս մասին այսօր մամուլի ասուլիսի ժամանակ ասաց Կովկասի ինստիտուտի տնօրեն Ալեքսանդր Իսկանդարյանը։
«Ես խնդրի լուծման ուղղությամբ տեղաշարժ չեմ տեսնում։ Ու ինչը շատ կարևոր է, այդ ուղղությամբ փորձեր, ջանքեր չեմ տեսնում։ Ոչ թե այն պատճառով, որ միջնորդները չեն ուզում, այլ նրանք պարզապես հակամարտության կողմերի վրա ազդելու հնարավորություն չունեն», — ասաց քաղաքագետը։
Միաժամանակ նա կարծում է, որ միջնորդներին` ի դեմս ԵԱՀԿ Մինսկի խմբի, հաջողվում է հակամարտության գոտում պահպանել փխրուն հրադադարի ռեժիմն ու կանխել լայնածավալ էսկալացիաները։ Փորձագետը կարծում է, որ այս իրավիճակում միջնորդներից ավելի շատ բան պետք չէ ակնկալել։
Խոսելով հակամարտության գոտում դիտորդների առաքելության ընդլայնման մասին (ամեն կողմից յոթ մարդ)` Իսկանդարյանը նշեց, որ դա շփման գոտում տեղի ունեցող միջադեպերի հետաքննման արդյունավետ միջոց չէ։ Միջադեպերի լիարժեք հետաքննության համար պետք է մոնիթորինգային առաքելությունում մի քանի հարյուր մարդ լինի, կարծում է նա։
«Սակայն հասկանալի է, որ Ադրբեջանն ամեն կերպ դիմադրելու է։ Նրանք պարտված կողմն են ու պետք է իրավիճակը լարված պահեն։ Իսկ ինչպե՞ս է կարելի այց անել, կրակելուց բացի», — հռետորական հարց է ուղղում Իսկանդարյանը։
«Կողմերից յուրաքանչյուրն ասում է, որ պատրաստ է փոխզիջումների գնալ։ Բաքվի համար փոխզիջումը փաստացիորեն նշանակում է վերադառնալ 1988 թվականի իրավիճակին` Ղարաբաղը լինի Ադրբեջանի կազմում` լայն ինքնավարության իրավունքով։ Հայաստանի համար փոխզիջումն առկա իրավիճակի պահպանումն է», — հավելեց Իսկանդարյանը։
Այսպիսի իրավիճակում հասկանալի է, որ կարգավորման մասին խոսք չի կարող լինել։
