ԵՐԵՎԱՆ, 17 մայիսի — Sputnik. Այսպես կոչված «Բիշքեկյան արձանագրության» կնքումը հայկական կողմի շահերից էր. այն հաշվի էր առնում ռազմաքաղաքական իրավիճակը, Sputnik Արմենիայի հետ հարցազրույցում ասաց ՀՀ պաշտպանության նախկին նախարար Վաղարշակ Հարությունյանը։
Նա նշեց, որ չի բացահայտի այդ պահի քաղաքական իրավիճակի բոլոր մանրամասները, բայց հրադադարի համաձայնագիրը քննադատողներից քչերն են պատկերացնում` ինչ է կատարվել իրականում։
««Բիշքեկյան արձանագրություն» կոչվող փաստաթուղթ չկա։ Կան փետրվարի 18-ի ու մայիսի 16-ի արձանագրությունները։ Բիշքեկում Հայաստանի, Ադրբեջանի ու Արցախի պատվիրակություններին հրադադարի կոչ են արել։ Իսկ փաստաթուղթը, որը սահմանում է` ուր տանել զորքերը, որտեղ լինեն դիտորդական կետերը, թռիչքներ չիրականացնելու տարածքը, շփման գծի հստակ սահմանները, ստորագրվել է մայիսի 16-ին», —ասաց Հարությունյանը։
Նրա խոսքով` հրադադարի մասին մի քանի պայմանագիր է եղել, առաջինը չի իրագործվել։ Ոչ ոք Հայաստանին չէր խանգարում առաջ գնալ, բայց երկրի ռազմաքաղաքական իրավիճակն այլ էր։
«Որոշումը կայացվել է իրադրության, շփման գծի ու տարածաշրջանի ռազմաքաղաքական իրավիճակը գնահատելուց հետո։ Այդ համաձայնագրի միջոցով Ադրբեջանն ուզում էր այնպես անել, որ հայկական ուժերը վերադառնան 1988 թվականի ԼՂՀՄ-ի սահմաններին, բայց չկարողացավ» — ասաց Հարությունյանը։
Նա նշեց, որ այդ փաստաթղթի շահավետության մասին է վկայում այն փաստը, որ հաջորդ օրը Ադրբեջանը դրանից հրաժարվելու փորձ արեց։
«Փորձի ձախողումից հետո նրանք հայտնեցին, որ Մամեդովը (Ադրբեջանի պաշտպանության նախարարը) այդ փաստաթուղթը ստորագրելու իրավունք չուներ։ Դա միակ փաստաթուղթն է, որի վրա կա Արցախի` որպես հակամարտության կողմի ստորագրությունը», — նշեց Հարությունյանը։
Նրա խոսքով` մայիսի 16-ի փաստաթուղթը («1994 թվականի փետրվարի 18-ից արձանագրության իրականացման մասին արձանագրությունը») լիովին Հայաստանի շահերից էր բխում ու համապատասխանում էր ստեղծված ռազմաքաղաքական իրավիճակին։
1994 թվականի մայիսի 16-17-ին Գրաչովի միջնորդությամբ հակամարտության երեք կողմերի ռազմական գերատեսչությունների ղեկավարների միջև բանակցություններ անցկացվեցին։ Այդ բանակցությունների ժամանակ հաստատվեց, որ կողմերը հավատարիմ են մնում ավելի վաղ ձեռք բերված հրադադարի մասին պայմանավորվածությանը։
