ԵՐԵՎԱՆ, 20 սեպտեմբերի — Sputnik. Հնագետներին երկար տարիներ անց հաջողվել է հասնել Տիգրանակերտի տարածքում պիկնիկների կազմակերպման արգելքին։ Այս մասին այսօր լրագրողներին ասաց պատմական գիտությունների դոկտոր, Տիգրանակերտում պեղումների ղեկավար Համլետ Պետրոսյանը։
Տիգրանակերտն այն քաղաքներից է, որ իր անունով կոչել է Տիգրան Մեծը մ.թ.ա. I դարում։ Այդ քաղաքներից մեկը եղել է նրա կայսրության մայրաքաղաքը։ Դրա ավերակները գտնվում են այժմյան Թուրքիայի Դիարբեքիր քաղաքից ոչ հեռու։
Մյուս հարցը, որն ավելի հրատապ է, ֆինանսավորումը ավելացնելն է։ Գիտնականները տարեկան խնդրում են 30-35 միլիոն դրամ, ստանում` 10-12 միլիոն։
Այդ գումարը բավականացնում է միայն տեղանքի պեղումների համար։ Ոսկորների, կերամիկայի, ապակու և զենքի մնացորդների ռադիոածխածնային անալիզը ստիպված են իրականացնել արտասահմանի գործընկեր —գիտնականների աջակցությամբ (այդ թվում` ծագումով հայ)։
Պետրոսյանը երկար տարիներ է, ինչ ղեկավարում է Տիգրանակերտի պեղումները, որը գտնվում է պատմական Արցախ նահանգում` ներկա Արցախի Հանրապետության տարածքում։
Պետությունը հսկում է Տիգրանակերտի պեղումների վայրը։ Երկար տարիներ պատմական արգելոցի դարպասներին գրված է եղել` մուտքի տոմսը` 250 դրամ, պիկնիկը` 5000 դրամ։
Բայց շատ հաճախ այստեղ կազմակերպել են «արքայական» բարքերով խնջույքներ. հնագույն քաղաքը ժամեր շարունակ պարուրված է եղել խորովածի գորշ ծխով։
«Պատկերացրեք տեսարանը։ Նստած են քեֆ անողները, հիանում են հնությամբ, ուտում–խմում են։ Իսկ հետին պլանում մենք` հնագետներս, աշխատում ենք բահերով։ Կարծես նրանք պարոններն են, իսկ մենք ճորտերը։ Համաձայնեք, որ այդքան հաճելի չէ», – հավելեց Պետրոսյանը։
Մշակույթի նոր նախարարն արդեն երկու անգամ եղել է այստեղ։ Ճիշտ է, Պետրոսյանն այդ մասին իմացել է միայն մի քանի օր անց, որովհետև այդ այցի մասին ոչ ոք նախօրոք չի հաղորդել։
Հուսով եմ, որ հիմա ինչ-որ բան կփոխվի։ Ամեն դեպքում վերջին հյուրին` Հայաստանի Ազգային անվտանգության ծառայության ղեկավար Արթուր Վանեցյանին, ես ասացի, որ պետք է վերջ տալ խնջույքներին։ Բարեբախտաբար, Արցախի իշխանությունները հարցը լուծեցին», – հավելեց գիտնականը։
Մնաց մյուս հարցը` պատշաճ ֆինանսավորումը։
