ԵՐԵՎԱՆ, 21 հունիսի – Sputnik. Սամվել Բաբայանն Արցախում ավարտել է ստորագրահավաքը, որով ցանկանում է Սահմանադրության մեջ փոփոխություն մտցնել, ըստ որի` Հայաստանում 10 տարի ապրածները ևս կարող են Արցախում նախագահ ընտրվել: Այս մասին գրում է «Հրապարակ» օրաթերթը` նշելով, որ իր աղբյուրին հարցրել է` ո՞րն է լինելու հաջորդ քայլը։
«Ստորագրությունները պետք է ներկայացվեն խորհրդարան, սակայն, բացի դրանց վավերականության հաստատումից, կա նաև ստորագրությունների բովանդակային խնդիրը. բանն այն է, որ ստորագրությունների մի մասը հավաքել են, ասենք, հարցնելով՝ ցանկանո՞ւմ եք ձեր կյանքը լավանա»,– ասել է նա:
Ըստ թերթի աղբյուրի` ամեն դեպքում 11 հազար ստորագրություն արդեն կա։
Ինչպե՞ս է Սամվել Բաբայանը զրկվել Արցախի քաղաքացիությունից
«Խորհրդարանից հետո այն պետք է ներկայացվի Սահմանադրական, մեր դեպքում` Գերագույն դատարան, Սահմանադրությանը համապատասխանելու մասով քննության համար։ Հետո կրկին վերադառնա խորհրդարան, ստանա մեկ երրորդի ձայնը, հետո դրվի հանրաքվեի»,– նշել է պարբերականի զրուցակիցը։
Թերթը նշում է` կա նաև Հայաստանի օրենքներին համապատասխանության հարցը։ Այնպես որ` շատ խճճված գործընթաց է: Սակայն ամենաէական խնդիրը հետևյալն է. Նիկոլ Փաշինյանի ամենակարևոր փաստարկներից մեկը, բանակցային սեղանի շուրջ, այն է, որ ղարաբաղցիներն ինձ չեն ընտրել, իսկ Ալիևին ադրբեջանցիներն ընտրել են, ուստի ես Ղարաբաղի փոխարեն չեմ կարող բանակցել։ Հիմա ի՞նչ է ստացվում` հայաստանցին կարող է գալ Ղարաբաղում ընտրվել, այսինքն՝ Փաշինյանի թեզը հօդս է ցնդում»։
Իսկ ինչպե՞ս կպահի իրեն ԱԺ ամենամեծ ուժը` Արայիկ Հարությունյանի (նույնպես` նախագահի թեկնածու) «Ազատ հայրենիքը»։
«Չի բացառվում, որ նրանք այս գլխից ազատ քվեարկություն հայտարարեն, որովհետև մեծ է հավանականությունը, որ այդ ստորագրությունները և ներկայացված պահանջը հակասահմանադրական համարվեն»,– ասել է աղբյուրը:
Հիշեցնենք` 2020 թվականին Արցախում նոր նախագահ են ընտրելու։ Գործող նախագահ Բակո Սահակյանը հայտարարել է, որ չի մասնակցելու 2020թ–ին կայանալիք ընտրությանը։ Նախկին վարչապետ Արայիկ Հարությունյանն ու անվտանգության խորհրդի քարտուղար Վիտալի Բալասանյանը հայտարարել են, որ պատրաստվում են ընտրական գործընթացներին։
