ԵՐԵՎԱՆ, 27 սեպտեմբերի – Sputnik. Սեպտեմբերի 22–ին ադրբեջանցիների ձեռնարկած դիվերսիայի անհաջող փորձի ժամանակ ադրրբեջանական կողմը, բացի չեզոք գոտում թողած մեկ դիակից, նաև մեկ վիրավոր է ունեցել, որը հետո է մահացել։ Այս մասին իր Facebook–յան էջում գրել է Արցախի նախագահի խորհրդական Տիգրան Աբրահամյանը
«Հարավային ուղղությամբ իրականացված ադրբեջանական դիվերսիայի վերլուծությունը ցույց է տվել, որ չեզոք գոտում ծանր վիրավորում էր ստացել ևս մեկ ադրբեջանցի զինծառայող, որը հասցրել էր մի կերպ իրեն շպրտել իրենց խրամատ»,–գրել է Աբրահամյանը` հավելելով, որ այս մասին ասել էին նաև միջադեպին ականատես մեր զինծառայողները։
Ադրբեջանցի զինծառայողի դին դուրս է բերվել չեզոք գոտուց և վերադարձվել
Նախագահի խորհրդականը գրել է, որ Ալեն Ղուլյանը սոցցանցերի ադրբեջանական տիրույթում նույն օրը, նույն ուղղությամբ խոցված զինծառայողի թաղման արարողություն, լուսանկարներ է գտել, որոնք այս պնդման ևս մեկ հաստատումն են։
«Ճիշտ է՝ կոչումը և զորատեսակը դեռ պարզ չի, բայց լուսանկարներից նկատելի է, որ հաստատ ժամկետային զինծառայող չի։ Խոցվածն Ադրբեջանի զինված ուժերի զինծառայող Գուրբաթ Գուրբաթ օղլու Գուլիևն է (Qürbət Qürbət oğlu Quliyev)»,–գրել է Աբրահամյանը։
Հիշեցնենք` ԱՀ ՊԲ–ն հաղորդագրություն էր տարածել, որ սեպտեմբերի 22-ին՝ ժամը 16:15-ի սահմաններում, արցախա-ադրբեջանական հակամարտ զորքերի շփման գծի հարավ-արևելյան հատվածում տեղակայված մարտական դիրքերից մեկի ուղղությամբ հակառակորդը ձեռնարկել է դիվերսիոն ներթափանցման փորձ:
ՊԲ դիրքապահ անձնակազմի գրագետ գործողությունների արդյունքում՝ հակառակորդը, չեզոք գոտում թողնելով մեկ դիակ, հետ է շպրտվել իր ելման դիրքերը: ՊԲ-ն որևէ կորուստ չի ունեցել։
Ավելի ուշ ՀՀ պաշտպանության նախարարը լրագրողների հետ զրույցում խուսափել էր գնահատական տալ դեպքին, ասելով, որ միգուցե ադրբեջանցի զինվորը մոլորվել է։
Միգուցե մոլորվել էր. Տոնոյանը` չեզոք գոտում հայտնված ադրբեջանցի զինծառայողի մասին
Հիշեցնենք նաև, որ ադրբեջանական կողմը դիմել էր Կարմիր խաչի միջազգային կոմիտեին դիվերսիայի պատճառով զոհված ադրբեջանցի զինծառայողի դիակը չեզոք գոտուց վերցնելու համար։
Ադրբեջանցու դին սեպտեմբերի 23–ին դուրս է բերվել չեզոք գոտուց և վերադարձվել։
