ԵՐԵՎԱՆ, 2 ապրիլի –Sputnik. Կառավարության այսօրվա նիստում ՀՀ վարչապետ Նիկոլ Փաշինյանը շնորհավորեց արցախցիներին մարտի 31-ին կայացած ընտրությունների առիթով:
«Ես կարծում եմ, որ տեղի են ունեցել բարձր որակի ընտրություններ, և դրա մասին վկայում են ընտրությունների պաշտոնական արդյունքները: Արձանագրենք, որ նախագահական ընտրությունների հանգուցալուծումն առաջին փուլով տալու համար թեկնածուներից մեկին՝ «Ազատ հայրենիք» կուսակցության ղեկավար Արայիկ Հարությունյանին, նախնական արդյունքներով չի հերիքել ընդամենը մի քանի հարյուր ձայն»,- ասաց վարչապետը:
Փաշինյանը նշեց, որ այս փաստն ինքնին խոսուն է, խոսուն է նաև ընտրություններին մասնակցած արցախցիների մեծ թիվը:
Անդրադառնալով խորհրդարանական ընտրություններին՝ ՀՀ վարչապետը շեշտեց, որ նախնական արդյունքներով խորհրդարան անցած ուժերի առաջին երկու տեղերում ոչ թե իշխանական, այլ ընդդիմադիր ուժերն են:
Հաստատվեց` Արցախում նախագահական ընտրությունների երկրորդ փուլ կանցկացվի
«Ես կարծում եմ, որ Արցախում ժողովրդավարության հետագա զարգացումը կարևոր է նաև հարցի արդարացի կարգավորման ու մեր տարածաշրջանում ավտանգության և կայունության տեսակետից»,- ասաց Փաշինյանը:
Հիշեցնենք՝ մարտի 31-ին Արցախում անցկացվեցին նախագահական և խորհրդարանական ընտրություններ։ ԱՀ ԿԸՀ նախագահ Սրբուհի Արզումանյանն երեկ՝ ապրիլի 1-ին տեղեկացրեց, որ նախագահական ընտրությունների երկրորդ փուլ կանցկացվի, քանի որ թեկնածուներից ոչ ոք չի հաղթահարել 50+1 տոկոսի շեմը։ Ընտրությունների երկրորդ փուլին կմասնակցեն նախագահի թեկնածուներ Արայիկ Հարությունյանն ու Մասիս Մայիլյանը։
Արցախի ապագա իշխանություններն առանձնահատուկ դեր ունեն ղարաբաղյան խաղաղ գործընթացում․ ԱԳՆ
