ԵՐԵՎԱՆ, 9 մայիսի — Sputnik. Ազգային ժողովի պաշտոնական կայքը տեղեկացնում է, որ մայիսյան եռատոնի կապակցությամբ պաշտոնական այցով Արցախ մեկնած ՀՀ Ազգային ժողովի նախագահ Արարատ Միրզոյանը հանդիպել է ԱՀ Ազգային ժողովի նախագահ Աշոտ Ղուլյանի հետ:
«Արարատ Միրզոյանը շնորհավորել է իր գործընկերոջը Շուշիի ազատագրման տարեդարձի կապակցությամբ և կրկին վերահաստատել, որ Արցախյան հակամարտության խնդիրը պետք է լուծվի՝ հիմք ընդունելով արցախցիների ազատ ինքնորոշման իրավունքը»,–նշված է հաղորդագրության մեջ։
Կողմերը քննարկման ընթացքում ամփոփել են երկու խորհրդարանների միջև համագործակցության արդյունքները:
Արցախի ԱԺ կայքից էլ տեղեկանում ենք, որ առանձնազրույցի ընթացքում ԱԺ նախագահներն ամփոփել են խորհրդարանական համագործակցության անցած ժամանակաշրջանը և վստահություն հայտնել, որ փոխգործակցության բարձր մակարդակը կպահպանվի Արցախի նորընտիր Ազգային ժողովի հետ:
Հաղթանակի օրը «Հաղթանակ» այգում. հարգանքի տուրքից մինչև ավիացիոն զորահանդես. լուսանկարներ
Առավոտյան տեղի ունեցած միջոցառումների շրջանակում Աշոտ Ղուլյանը և Արարատ Միրզոյանը հարգանքի տուրք են մատուցել Հայրենական մեծ պատերազմի և արցախյան ազատամարտի նահատակների հիշատակին։ Նրանք այցելել են Շուշի ու ծաղիկներ խոնարհել բերդաքաղաքն ազատագրողներին նվիրված և Վազգեն Սարգսյանի հուշարձաններին:
