ԵՐԵՎԱՆ, 23 հունիսի – Sputnik. Արցախի նախագահ Արայիկ Հարությունյանը հրաժարվել է իր աշխատավարձից։ Նա իր մտադրության մասին գրել է Facebook սոցցանցում։
«Որոշում եմ կայացրել կանոնակարգված կերպով մինչև տարեվերջ ամեն ամիս աշխատավարձիցս 150 000 դրամ փոխանցել Իվան Աթայանի անվան կրթական հիմնադրամին։ Այդ գումարը կուղղվի բնագիտական առարկաներից բարձր առաջադիմություն ցուցաբերած ուսանողներին կրթաթոշակ տրամադրելու համար»,–գրել է Հարությունյանը։
Նա նշել է, որ աշխատավարձի մնացած մասն էլ կուղղի Արցախի ազատամարտիկների միության ֆոնդին, որի վարչության անդամ է հանդիսանում և լիովին վստահում կառույցի աշխատանքի թափանցիկությանը: Գումարը կծառայի առաջին կարգի զինհաշմանդամների տարբեր սոցիալական խնդիրների լուծմանը:
Հարությունյանը հիշեցրել է, որ որպես վարչապետ և պետնախարար` ավելի քան մեկ տասնամյակ աշխատած տարիների ընթացքում ամենամսյա աշխատավարձը պարբերաբար տրամադրել է տարբեր բարեգործական ծրագրերի իրականացմանը: Նա նշել է` քանի որ իր ընտանիքը եկամտի այլ աղբյուրներ ունի, երբևէ ո՛չ աշխատավարձ է ստացել, ո՛չ էլ արտասահմանյան գործուղումների ժամանակ օգտվել պետական միջոցներից:
Հիշեցնենք, որ Արայիկ Հարությունյանը նույնիսկ պաշտոնական հայտարարագրերով Արցախի ամենահարուստ պաշտոնյաներից մեկն է: Մի անգամ նա լրագրողներին ասել է, որ ազատագրված տարածքներում հող է մշակել, գյուղմթերքի վերամշակմամբ զբաղվել և այդպես ունեցված կուտակել։
Հարությունյանն Արցախի նախագահ է ընտրվել այս տարվա ապրիլի 14-ին կայացած ընտրությունների ժամանակ։
Մենք հարկադրված ենք ամեն օր պատրաստ լինել պատերազմի. Արայիկ Հարությունյան
