ԵՐԵՎԱՆ, 28 սեպտեմբերի - Sputnik. ՌԴ–ում ՀՀ դեսպան Վարդան Տողանյանը ռուսաստանյան լրատվամիջոցներին հայտնել է, որ Լեռնային Ղարաբաղում ադրբեջանական կողմից կռվում են Թուրքիայից ու Սիրիայից Ադրբեջան տեղափոխված ահաբեկիչներ։
ՀՀ դեսպանը հայտարարել է, որ ահաբեկիչ–վարձկաններին հավաքագրել ու Ադրբեջան է տեղափոխել Թուրքիան։
Հիշեցնենք` Հայկական միասնական տեղեկատվական կենտրոնը սեպտեմբերի 27-ի երեկոյան հայտնել էր, որ ըստ հետախուզության տվյալների` Սիրիայից մոտ 4000 գրոհային է մասնակցում Ադրբեջանի սանձազերծած ռազմական գործողություններին։
«Ճշտված տեղեկություններով` գրոհայինների շարքում կա 81 զոհ»,–նշված էր կենտրոնի տարածած հաղորդագրության մեջ։
Արցախյան հացի փռերում, ալրաղացներում աշխատուժի պահանջարկ կա
ՀՀ ՊՆ ներկայացուցիչ Արծրուն Հովհաննիսյանը նույնպես անդրադարձել էր այս լուրերին` ասելով, որ նախարարությունն արդեն որոշ տեղեկությունների տիրապետում է և՛ գրոհայինների մասով, և՛ Թուրքիայի միջամտության, և՛ թուրքական արտադրության զինտեխնիկայի կիրառության։ Բայց այդ տվյալները, նրա խոսքով` դեռ շատ տվյալներ ճշտման կարիք ունեն։
Հիշեցնենք, որ սեպտեմբերի 27–ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով: Ըստ վերջին տեղեկությունների` ադրբեջանական զինուժը կորցրել է 5 ուղղաթիռ, 27 անօդաչու թռչող սարք, 33 տանկ և ՀՄՄ, 2 ինժեներական զրահատեխնիկա։
Հակառակորդի կրակոցների հետևանքով քաղաքացիական բնակչությունից Մարտունիում մեկ կին և մեկ երեխա են զոհվել, զոհվել են նաև 31 զինծառայող։ Հայկական կողմը 200 վիրավոր ունի։ Հակառակորդի կորուստներն անհամեմատ մեծ են։ Արցախում և Հայաստանում ռազմական դրություն և համատարած զորահավաք է հայտարարվել։
