ԵՐԵՎԱՆ, 3 հոկտեմբերի – Sputnik. Արցախի վրա հարձակվելու առաջին իսկ օրվանից Ադրբեջանը սկսել է կիրառել բացառապես հարձակողական զինտեխնիկա։ Sputnik Արմենիայի հետ զրույցում վերլուծելով հակառակորդի կիրառած զինատեսակները, այսպիսի տեսակետ հայտնեց ռազմական փորձագետ Վահագն Սարոյանը։
«Սկսեցին կիրառել «Սմերչ», «Կասիրգա», «Պոլոնեզ», որոնցով ադրբեջանական բանակը թիրախավորում էր հայկական խաղաղ բնակչությանը, և ինչը միջազգային կոնվենցիաներով, միջազգային մարդասիրական իրավունքի տեսանկյունից արգելված է կիրառել խաղաղ բնակչության վրա։ Սակայն Ադրբեջանը խախտել է բոլոր միջազգային կոնվենցիաները, հատել է բոլոր կարմիր գծերը`կիրառելով կասետային, ֆուգասային, բեկորաֆուգասային զենքեր»,– ասաց Սարոյանը։
Նման զինատեսակներ, նրա խոսքով, կիրառվել են նաև Սիրիայում, ինչն էլ հանգեցրել է մարդկային մեծաթիվ կորուստների, հումանիտար ու բնապահպանական աղետի, նաև հետագա սերունդների համար վտանգավոր հետևանքների։
Արցախի դեմ Ադրբեջանը կիրառել է նաև Իսրայելական արտադրության «Լոռա» տեսակի բալիստիկ հրթիռ, որը ևս արգելված է կիրառել խաղաղ բնակչության, բնակավայրերի նկատմամբ։
«Այդ «Լոռա» հրթիռները նախատեսված են հակառակորդի խորը թիկունքում գտնվող ռազմավարական ենթակառուցվածքները խոցելու համար` կապի միջոցներ և այլն։ Սակայն ադրբեջանական կողմը դրանք կիրառեց խաղաղ բնակչության վրա։ Տեսել ենք Ստեփանակերտում կադրերը, տեսել ենք Հորադիզում կադրերը, Մարտունիում, Մարտակերտում»,– ասաց Սարոյանը։
Հակառակորդը «Սմերչ» է օգտագործել. տեսանյութ
Ռազմական փորձագետի համոզմամբ` պատերազմի ավարտից հետո այս խնդիրը պետք է տեղափոխվի միջազգային իրավունքի դաշտ և քննվի պատերազմական հանցագործություն իրականացնելու տեսանկյունից։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 3-ի ժ. 16։00-ի դրությամբ` հակառակորդի կրակոցների հետևանքով զոհվել են 209 զինծառայողներ և 8 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 1750 զոհ ունի, 2700 վիրավոր։ Հակառակորդը նաև զինտեխնկայի զգալի կորուստ ունի և շարունակում է գրանցել։
«Մենք ձեզ սնիկերս, դուք մեզ` խոցված տանկեր». աղջիկների գրությունները զինվորներին
Արցախում և Հայաստանում ռազմական դրություն և համատարած զորահավաք է հայտարարվել։
«Մենթալիտետն է բարբարոսական». գնդապետը ռուսաստանցի լրագրողի հարցին պատասխան չգտավ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել է Վարդենիսի տարածաշրջանը։ Վարդենիսում թշնամու ԱԹՍ հարվածից քաղաքացիական ավտոբուս է այրվել և մեկ խաղաղ բնակիչ զոհվել։ Եվս մեկ խաղաղ բնակիչ էլ զոհվել է Գեղարքունիքի մարզում։
