ԵՐԵՎԱՆ, 6 հոկտեմբերի - Sputnik. Շուտով գործարկվելու է առողջապահության նախարարության թեժ գիծ, որի միջոցով հարազատները կկարողանան պարզել վիրավոր զինվորի գտնվելու վայրն ու տեղեկանալ նրա առողջական վիճակի մասին։
Գորիսում կայացած լրագրողների հետ ճեպազրույցում տեղեկությունը հայտնեց ՀՀ առողջապահության նախարար Արսեն Թորոսյանը։
Նրա խոսքով՝ հազվադեպ է լինում, երբ վիրավոր զինվորի անուն, ազգանունը հայտնի չի լինում, չեն կարողանում հարազատներին տեղեկացնել վիճակի մասին։
«Քիչ դեպքեր են լինում, երբ անճանաչելի վիրավորներ են լինում, գիտակցություն չունեն, իրավիճակով պայմանավորված չենք կարողանում պարզել, թե որ զորամասից է, ով է»,- նշեց նախարարը՝ հավելելով, որ եթե զինվորը գիտակցություն ունի, ապա կապ է հաստատում հարազատի հետ։
Ադրբեջանցիները ապատեղեկատվություն են տարածել, թե Արցախի նախագահը վիրավորվել է
Անդրադառնալով վիրավոր զինծառայողների առողջական վիճակին՝ նախարարը տեղեկացրեց, որ վիրավորների մեծ մասի վիճակը միջին ու թեթև ծանրության է։
Ծանր և ծայրահեղ ծանր վիրավորներ էլ կան, որոնք ավելի քիչ տոկոս են կազմում, բայց նրանք ավելի մեծ խնամք են պահանջում։ Թորոսյանն ընդգծեց՝ բժշկական ամբողջ ներուժն ուղղված է հենց նրանց, որ հնարավոր լինել կյանքերը փրկել։
