ԵՐԵՎԱՆ, 6 հոկտեմբերի – Sputnik. Հադրութի քաղաքապետ Վահան Սավադյանի տան վրա ռեակտիվ արկ է ընկել։ Այդ պահին քաղաքապետի ընտանիքը նկուղում է եղել։ Լուսանկարում երևում է արկի թողած հետքերը` առաստաղի վրա հսկայական ճեղք է բացվել, տան ամբողջ հատակը ծածկված է բեկորներով։
Պատերազմի առաջին օրվանից Ադրբեջանի զինված ուժերի կողմից ինտենսիվ հրետակոծվում են Հադրութի բնակելի տներն ու քաղաքացիական ենթակառուցվածքները։
Հակառակորդն այստեղ կիրառել է արգելված զինատեսակ՝ կասետային արկեր, որի հետևանքով մի կին է մահացել։
«Երբ քաղաքի բնակիչները տեսնում են, որ իրավիճակը թեժանում է, նրանք համախմբված գնում են ապաստարաններ։Քաղաքի կանանց ու երեխաներին մենք արդեն տարհանել ենք, իսկ տղամարդիկ ամուր կանգնած են ու պաշտպանում են իրենց հողը։ Ամեն ինչ կարգին է։ Մենք արդեն կոփվել ենք», - ասել է Հադրութի քաղաքապետը WarGonzo նախագծի ղեկավար Սեմյոն Պեգովին տված հարցազրույցում։
Սավադյանը, որն անձամբ է զենքը ձեռքին պաշտպանում հայրենի հողը, իր մոտ է պահում այն մարդկանց տների բանալիները, որոնք ժամանակավորապես լքել են քաղաքը։
Հադրութում մարտերը շարունակվում են, հրետակոծությունը չի դադարում։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 6-ի ժամը 09։00-ի դրությամբ` հակառակորդի կրակոցների հետևանքով զոհվել են 244 զինծառայողներ և 19 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 3454 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 16 ուղղաթիռ, 126 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 379 տանկ և ՀՄՄ:
Առաջնագծում գտնվող տղաներն անում են անհնարինը. տեսանյութ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հայացք թաքստոցից․ մահվան աչքերին նայած արցախցիները․ լուսանկարներ
