ԵՐԵՎԱՆ, 7 հոկտեմբերի – Sputnik. Պետական պաշտոններ զբեցնող անձինք ու պետական ծառայողները սոցիալական փաթեթով իրենց հատկացված գումարները կկարողանան փոխանցել ՀՀ հիմնադրամներին։ «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» ՀՀ օրենքում կառավարության առաջարկած այս նախագիծն այսօր ընդունվեց ԱԺ արտահերթ նիստում։
Նախագիծը ներկայացնելիս ՀՀ ֆինանսների նախարարի տեղակալ Արման Պողոսյանը նշեց, որ գումարները կարող են փոխանցվել միայն այն հիմնադրամներին, որոնք իրականացնում են Հայաստանի Հանրապետության կայուն ու համաչափ զարգացման, տնտեսության կայունացման օժանդակման կամ այլ համապետական ծրագրեր։
«Նախագծի ընդունման անհրաժեշտությունն առաջացել է այն պատճառով, որ պայմանավորված ռազմական դրությամբ` մի շարք պետական պաշտոններ և պետական ծառայության պաշտոններ զբաղեցնող անձինք ցանկանում են մասնակցել ռազմական դրության արդյունքում պետության կարիքների ֆինանսավորման համար իրականացվող դրամահավաքներին»,– ասաց փոխնախարարը:
Նա նաև պարզաբանեց, որ ներկայում սոցիալական փաթեթի ուղղությունները սահմանված են օրենքով և դրանից բացի այլ ուղղություններով նշված գումարները չեն կարող օգտագործվել:
Հաշվի առնելով ստեղծված իրավիճակը`ՀՀ կառավարությունը որոշել փոփոխություններ կատարել օրենքում ու պետական ծառայողներին հնարավորություն տալ սոցիալական փաթեթի գումարներն ուղղել Արցախին ու Հայաստանին աջակցող հիմնադրամներին։
Ընդ որում, հետագա հնարավոր չարաշահումներից խուսափելու նպատակով սահմանվում է նաև, որ այն հիմնադրամը, որին կթույլատրվի վճարում կատարել, պետք է սահմանված լինի ՀՀ կառավարության որոշմամբ:
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 6-ի ժամը 09։00-ի դրությամբ` հակառակորդի կրակոցների հետևանքով զոհվել են 244 զինծառայողներ և 19 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 3454 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 16 ուղղաթիռ, 126 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 379 տանկ և ՀՄՄ:
Առաջնագծում գտնվող տղաներն անում են անհնարինը. տեսանյութ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հայացք թաքստոցից․ մահվան աչքերին նայած արցախցիները․ լուսանկարներ
