ԵՐԵՎԱՆ, 8 հոկտեմբերի – Sputnik. Ռուսաստանում ՀՀ դեսպանությունը պատրաստ է ստանձնել Շուշիում հրթիռակոծության հետևանքով վիրավորված ռուս լրագրողի տեղափոխումը Մոսկվա, եթե դրա անհրաժեշտությունը լինի։ Sputnik Արմենիայի թղթակցի հետո զրույցում տեղեկությունը հայտնեց Ռուսաստանում ՀՀ արտակարգ և լիազոր դեսպան Վարդան Տողանյանը։
Ավելի վաղ հայտնել էինք, որ Շուշիում ադրբեջանական ԶՈւ հրթիռակոծության հետևանքով լրագրողներ են վիրավորվել` «Сегодня.ру» կայքի գլխավոր խմբագիր Յուրի Կոտենոկը, «Ռուսաստանի սպաներ» տեղեկատվական հարթակի հատուկ թղթակից Լևոն Արզանովը, ինչպես նաև նրանց ուղեկիցը` Հրանտ Բալադյանը։ Sputnik Արմենիայի տեղեկություններով` Կոտենոկն ունի թևի կոտրվածք, բեկորային վնասվածքներ կրծքավանդակի, որովայնի և վերջույթների շրջանում։ Նրան տեղափոխել են Ստեփանակերտի բուժհաստատություններից մեկը, որտեղ արդեն վիրահատել են։
«Եթե նրա կյանքին վտանգ չսպառնա, և բժիշկները թույլ տան տեղափոխել, դեսպանությունը պատրաստ է կազմակերպել հատուկ բժշկական ինքնաթիռով նրա տեղափոխումը Մոսկվա»,– նշեց դեսպան Տողանյանը։
Հավելենք, որ Sputnik Արմենիայի տեղեկություններով` Շուշիում հրթիռակոծության հետևանքով լրագրողներից բացի ևս 7 մարդ է վիրավորվել։
Հիշեցնենք` Ադրբեջանն այսօր առավոտյան հրթիռակոծել էր Շուշիի Սուրբ Ղազանչեցող եկեղեցին, այդ պահին ներսում երեխաներ էին եղել։ Բարեբախտաբար, ոչ ոք չէր տուժել։
Դրանից հետո հրթիռակոծության հետևանքները լուսաբանելու համար եկեղեցի էին գնացել Արցախում աշխատող տեղական ու միջազգային լրատվամիջոցները:
Ադրբեջանական զինված ուժերը կրկին հրթիռակոծել էին եկեղեցին, և լրագրողները վնասվածքներ էին ստացել այդ հարվածներից։
Արցախի հրետակոծված շենքերի բնակիչները պատերազմի ավարտից հետո պետական փոխհատուցում կստանան
