ԵՐԵՎԱն, 12 հոկտեմբերի - Sputnik. Պաշտպանության բանակը տեղեկացնում է, որ ադրբեջանական լրատվամիջոցների կողմից շրջանառվող լուրերը, թե Կարմիր շուկայի ուղղությամբ նահանջող ՊԲ ստորաբաժանումներին հասցվել են հրետանային հարվածներ, որոնց արդյունքում կան լուրջ կորուստներ, սուտ են։
«Ադրբեջանական քարոզչամեքենան, սովորության համաձայն, խեղաթյուրում է իրականությունը։ Նրանք փորձում են ամեն գնով ապացուցել Հադրութը վերահսկողության տակ վերցնելու մասին Իլհամ Ալիևի մերկապարանոց հայտարարությունը: ՊԲ ստորաբաժանումները ռազմաճակատի ամբողջ երկարությամբ շարունակում են վստահորեն կատարել առաջադրված մարտական խնդիրները»,–նշված է ՊԲ հայտարարության մեջ:
ՊԲ ստորաբաժանումները հաջողությամբ կասեցնում են հումանիտար հրադադարի ռեժիմին չհետևող ադրբեջանական զինուժի հարձակողական գործողությունների փորձերը: Հադրութի ուղղությամբ շարունակվում է ներթափանցած դիվերսիոն-հետախուզական խմբի շրջափակման և ոչնչացման ռազմագործությունը:
ՊԲ–ն հորդորում է հետևել բացառապես պաշտոնական լրահոսին:
Հիշեցնենք, որ Ադրբեջանի նախագահ Իլհամ Ալիևը դեռ հոկտեմբերի 9-ին հայտնել էր, թե իբր Հադրութը գրավել են։ Դրանից հետո ՀՀ ՊՆ–ն պաշտոնապես հերքել էր տարածված լուրերը, որից հետո ադրբեջանական կողմը պարբերաբար հարձակումներ է ձեռնարկում այդ ուղղությամբ։
Մասնավորապես, հոկտեմբերի 10-ին, հումանիտար հրադադարն ուժի մեջ մտնելուց րոպեներ առաջ ադրբեջանական դիվերսոն խումբ էր մտել Հադրութ։
Հադրութի վարչակազմի ղեկավարի ներկայացմամբ՝ հայկական կողմից կա 5 զոհ։
Սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 12-ի ժամը 11։00-ի դրությամբ` հակառակորդի կրակոցների հետևանքով զոհվել են ավելի քան 400 զինծառայողներ և 20 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 49719 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 16 ուղղաթիռ, 168 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 514 տանկ և ՀՄՄ:
Ինչին պետք է ընտելանանք, եթե Ադրբեջանի հետ պատերազմը երկարի
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ Զոհվել է 2 քաղաքացիական անձ։
Հրադադար, բայց ոչ խաղաղություն. ի՞նչ խնդիր պետք է լուծի բանակը արցախյան պատերազմից հետո
