ԵՐԵՎԱՆ, 12 հոկտեմբերի - Sputnik. Ադրբեջանի և Թուրքիայի սանձազերծած պատերազմի 16 օրերի ընթացքում Արցախում նաև 3 ասորի զինծառայող է զոհվել։ Տեղեկությունը Sputnik Արմենիայի հետ զրույցում հայտնեց Հայաստանում ասորական եկեղեցու քահանա Նիկադիմ Յուխանաևը։
18-ամյա Թորգոմ Սայադյանը զոհվել է հոկտեմբերի 10–ին։ Նա ժամկետային զինծառայող էր։ Ծնվել էր Արարատի մարզի Վերին Դվին գյուղում։ Տղայի հայրը ասորի է, մայրը` հայ։
«Թորգոմը վերջին 3-4 տարիներին ծնողների հետ ապրում էր Ռուսաստանում։ ՌԴ–ից հատուկ տեղափոխվել էր Հայաստան՝ հայկական բանակում ավագ եղբոր հետ ծառայելու համար։ Երկուսն էլ ՀՀ զինված ուժերում ծառայության էին անցել այս տարվա հունվարին և եղել են նույն դիրքում», - պատմեց Նիկադին Յուխանաևը։
19-ամյա Նարեկ Դավթյանը զոհվել է սեպտեմբերի 27-ին` Արցախում մարտական գործողությունների առաջին օրը : Նա ևս ժամկետային զինծառայող էր։ Ծնվել էր Արմավիրի մարզի Նոր Արտագերս գյուղում։ Ե՛վ հայրը, և՛ մայրը ասորի են։
Նարեկի համագյուղացի Խաչատուր Հակոբյանը Facebook-ի իր էջում հրապարակել է հերոսի լուսանկարը։
«Նարեկն ազգությամբ ասորի է։ Մենք ուս ուսի պայքարում ենք ։ Շնորհակալություն»,– գրել է նա։
Հոգևոր հայրը նշեց, որ այսօր հայտնի է դարձել ևս մեկ զոհվածի անուն, որը նույնպես ասորի է։
«Ռուդիկ Սարխոշևը որպես կամավոր էր մեկնել պատերազմ։ Նա 59 տարեկան էր։ Ապրում էր Կոտայքի մարզի Արզնի գյուղում», - ասաց նա։
Ավելի վաղ Երևանում հրաժեշտ էին տվել նաև ռուս զինծառայող Եվգենի Գորոդնիչիին, որը զոհվել էր հոկտեմբերի 3–ին։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 12-ի ժամը 18։00-ի դրությամբ` հակառակորդի կրակոցների հետևանքով զոհվել են 480 զինծառայողներ և 20 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 4919 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 16 ուղղաթիռ, 168 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 514 տանկ և ՀՄՄ:
Ինչին պետք է ընտելանանք, եթե Ադրբեջանի հետ պատերազմը երկարի
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ Զոհվել է 2 քաղաքացիական անձ։
Հրադադար, բայց ոչ խաղաղություն. ի՞նչ խնդիր պետք է լուծի բանակը արցախյան պատերազմից հետո
