ԵՐԵՎԱՆ, 14 հոկտեմբերի – Sputnik. ՌԴ պաշտպանության նախարար Սերգեյ Շոյգուն հեռախոսազրույց է ունեցել Հայաստանի և Ադրբեջանի պաշտպանական գերատեսչությունների ղեկավարներ Դավիթ Տոնոյանի և Զաքիր Հասանովի հետ։ Շոյգուն կողմերին կոչ է արել ամբողջ ծավալով կատարել Մոսկվայում ձեռք բերված պարտավորությունները, հաղորդում է Ռուսաստանի պաշտպանության նախարարության մամուլի ծառայությունը:
«Բանակցությունների ընթացքում Ռուսաստանի Դաշնության պաշտպանության նախարար, բանակի գեներալ Սերգեյ Շոյգուն իր գործընկերներին կոչ է արել ամբողջ ծավալով կատարել ադրբեջանական և հայկական կողմերի պարտավորությունները, որոնք ձեռք են բերել հոկտեմբերի 10-ին Մոսկվայում»,-ասվում է հաղորդագրության մեջ։
Ավելի վաղ Շոյգուն հայտարարել էր, որ Ռուսաստանի պաշտպանության նախարարությունն իր լիազորությունների շրջանակում ակտիվորեն մասնակցում է Լեռնային Ղարաբաղում իրավիճակի կայունացմանն ուղղված Ռուսաստանի նախաձեռնությունների կյանքի կոչմանը: Տարբեր երկրների գործընկերների հետ տարվող աշխատանքի գլխավոր խնդիրը մարտական գործողությունների շուտափույթ դադարեցումն է և ղարաբաղյան հակամարտության կողմերի միջև բանակցությունների վերսկսումը:
Մենք չենք կարող զանգել ԼՂՀ և աջ ու ձախ հրամաններ տալ․ Մնացականյան
Հիշեցնենք` Հայաստանի և Ադրբեջանի արտգործնախարարներ Զոհրաբ Մնացականյանն ու Ջեյհուն Բայրամովը հոկտեմբերի 9–ին Մոսկվա էին մեկնել` խորհրդատվություններ անցկացնելու։ ՌԴ արտգործնախարար Սերգեյ Լավրովի հետ համատեղ հանդիպումը տևեց գրեթե 11 ժամ և ավարտվեց համաձայնագրի ընդունմամբ, որը հակամարտության կարգավորման չորս կետ է պարունակում։ Մասնավորապես, կողմերը պայմանավորվել են, որ հոկտեմբերի 10-ին, ժամը 12։00-ից սկսած հումանիտար նպատակներով հրադադար կհաստատվի ռազմագերիներին, այլ պահվող անձանց և զոհվածների մարմինները փոխանակելու համար՝ Միջազգային Կարմիր խաչի չափանիշներին համապատասխան։
Սակայն հրադադարի ռեժիմը չի պահպանվում։ Ադրբեջանական զինուժը շարունակում է նախահարձակ գործողությունները։
Առաջընթացի մասին խոսելն անհնար կլիներ առանց այս իրավիճակին վերջնակետ դնելու. Մնացականյան
