ԵՐԵՎԱՆ, 15 հոկտեմբերի – Sputnik. Հայաստանը Ղարաբաղի հարցում մշտապես պատրաստ է եղել փոխզիջումների, բայց կան կարմիր գծեր, որոնք Հայաստանը երբեք չի անցնի։ Այս մասին ասել է ՀՀ վարչապետ Նիկոլ Փաշինյանը Ադրբեջանի նախագահ Իլհամ Ալիևի հետ զուգահեռ «Ռոսիա սեգոդնյա» միջազգային լրատվական գործակալության տնօրեն Դմիտրի Կիսելյովին տված հարցազրույցում։
Նրա խոսքով` Երևանի համար կարմիր գիծը Լեռնային Ղարաբաղի բնակչության ինքնորոշման իրավունքն է։
«Միշտ, բոլոր ժամանակներում Հայաստանը պատրաստ է եղել փոխզիջումների։ Եվ ամենահայտնին Կազանյան նախաձեռնությունն է, երբ Հայաստանը պատրաստ էր կոնկրետ փոխզիջման։ Բայց Ադրբեջանը հրաժարվեց ստորագրել համաձայնագիրը, քանի որ Ադրբեջանը չէր ուզում ու չի ուզում ընդունել Լեռնային Ղարաբաղի հայության ինքնորոշման իրավունքը»,– հայտարարել է նա։
ՀՀ վարչապետը նաև մեկնաբանել է, թե ինչ սկզբունքների վրա է հիմնված հոկտեմբերի 10-ին Մոսկվայում ստորագրված հումանիտար զինադադարի համաձայնագիրը։ Դրանք, նրա խոսքով, հանրահայտ սկզբունքներ են` ազգերի ինքնորոշման իրավունքը, ուժի չկիրառում, ուժի կիրառման սպառնալիքի բացառում, տարածքային ամբողջականություն։
«Հարցը նրանում է, թե ինչպես են այս սկզբունքները մեկնաբանում կողմերից յուրաքանչյուրը։ Բանն այն է, որ բանակցային պրոցեսի ընթացքում պարզվեց, որ կողմերը դրանք տարբեր կերպ են մեկնաբանում։ Եվ այսօր մենք ունենք մի իրավիճակ, երբ ղարաբաղյան հարցի լուծման համար ամենաառանցքային սկզբունքն արդեն խախտված է։ Դա ուժի չկիրառման ու ուժի կիրառման սպառնալիքի բացառման սկզբունքն է»,– ասել է Փաշինյանը։
Պատասխանելով հարցին, թե կոնկրետ ինչ փոխզիջումների է պատրաստ Հայաստանը, Փաշինյանն ասել է, որ մոսկովյան համաձայնագրում հստակ քննարկվել ու արձանագրվել են այն քայլերը, որոնք անհրաժեշտ են բանակցային գործընթացի վերականգնման համար։ ՀՀ վարչապետը հայտարարել է, որ Հայաստանը պատրաստ է իրականացնել ադ քայլերը` ԼՂ խնդրի լուծման համար։
«Մենք պատրաստ են այնպիսի համարժեք փոխզիջումների, որոնց պատրաստ է Ադրբեջանը»,– ընդգծել է Փաշինյանը։
Հիշեցնենք` Հայաստանի և Ադրբեջանի արտգործնախարարներ Զոհրաբ Մնացականյանն ու Ջեյհուն Բայրամովը հոկտեմբերի 9–ին Մոսկվա էին մեկնել` խորհրդատվություններ անցկացնելու։ ՌԴ արտգործնախարար Սերգեյ Լավրովի հետ համատեղ հանդիպումը տևեց գրեթե 11 ժամ և ավարտվեց համաձայնագրի ընդունմամբ, որը հակամարտության կարգավորման չորս կետ է պարունակում։ Մասնավորապես, կողմերը պայմանավորվել են, որ հոկտեմբերի 10-ին, ժամը 12։00-ից սկսած հումանիտար նպատակներով հրադադար կհաստատվի ռազմագերիներին, այլ պահվող անձանց և զոհվածների մարմինները փոխանակելու համար՝ Միջազգային Կարմիր խաչի չափանիշներին համապատասխան։
Առաջընթացի մասին խոսելն անհնար կլիներ առանց այս իրավիճակին վերջնակետ դնելու. Մնացականյան
Սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 15-ի ժամը 14:00-ի դրությամբ` հակառակորդի կրակոցների հետևանքով զոհվել են 604 զինծառայողներ և 32 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 5486 զոհ ունի, ավելի քան 5000 վիրավոր։
Ըստ վերջին տվյալների՝ Ադրբեջանի զինված ուժերը կորցրել են 19 ինքնաթիռ, 16 ուղղաթիռ, 176 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 541 տանկ և ՀՄՄ:
«Ես կրակի տակ ամենաթանկ բանն եմ թողել՝ որդուս». ինչպես են ապրում արցախցիները Ջրամբարում
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ Զոհվել է 2 քաղաքացիական անձ։
Նույնիսկ ճանճը չի կարող խուսափել հայուհու դիպուկ հարվածից. արցախյան պատերազմի կանացի դեմքը