ԵՐԵՎԱՆ, 19 հոկտեմբերի - Sputnik. Այսօր բողոքի ակցիա է տեղի ունեցել ՀՀ-ում ԱՄՆ-ի դեսպանատան դիմաց. ցուցարաները պահանջում էին զսպել Արցախում Ադրբեջանի սանձազերծած ագրեսիան:
ԱՄՆ դեսպանատան ներկայացուցիչը հանդիպել է ցուցարարների հետ, սակայն այդ զրույցը, ըստ ցուցարարների, առանձնապես օգուտ չի տա, եթե կոնկրետ քայլեր չձեռնարկվեն։
«ԱՄՆ դեսպանատնից մեզ ասացին, որ տեղյակ են տիրող իրավիճակին, սակայն որևէ արձագանք իրենց երկրի ղեկավարի անունից հնչեցնել չեն կարող։ Ողջունում էին, որ Հայաստանում կարող են այսպես խաղաղ հարցի լուծում պահանջել։ Զարմացած էին, որ մենք մեր տեսակով չենք կարող դուրս գալ քաղաքակիրթ կեցվածքից։ Ցավալի էր, որ նրանք իմանալով ճշմարտությունը, 21–րդ դարում վախենում են հնչեցնել ճշգրիտ գնահատական և իրերը կոչել իրենց անուններով»,–ասաց ցուցարարներից մեկը։
Մյուս ցուցարարի խոսքով` դեսպանատան ներկայացուցիչը նշել է, որ իրենք անմիջական կապի մեջ են Արցախի Հանրապետության մարդու իրավունքների պաշտպանի, Արցախի արտգործնախարարության հետ ու տիրող իրավիճակի մասին տեղեկատվությունն ուղարկում են Վաշինգտոն։
«ԱՄՆ դեսպանատան ներկայացուցիչը խոստացավ մեր ներկայացրած պահանջներից անձամբ զեկուցագիր կազմել և վաղն ուղարկել Վաշինգտոն։ Մենք սպասում ենք կոնկրետ գործողությունների, կոչեր արդեն լսել ենք»,–ասաց նա։
ՄԱԿ–ի առջև բողոքի ակցիա անող արցախցիներին հազարավոր հայաստանցիներ միացան. լուսանկարներ
Ցուցարարի խոսքով` ևս մեկ անգամ պաշտոնապես չհերքվեց, որ Ադրբեջանի սանձազերծած պատերազմին միացել են նաև ահաբեկիչները։
«Դրանք նույն այն ահաբեկիչներն են, որ սեպտեմբերի 11–ին Նյու Յորքն էին պայթեցնում։ Նույն ահաբեկիչներն են, որոնք անկայունություն են տարածում ողջ աշխարհում։ Նա անգամ չկարողացավ նայել տեսանյութը, թե ինչպես են ադրբեջանական ահաբեկիչները կենդանի մորթում հայ զինվորին։ Նա փակեց աչքերը և թեքեց գլուխը։ Տեսնում են հայերի հանդեպ կատարվող ոճրագործությունները, բայց շարունակում են լռել»,–ասաց նա։
ԱՄՆ դեսպանատան դիմաց ցուցարարները ևս մեկ անգամ պահանջեցին, որ ԱՄՆ–ն դադարի զենք վաճառել Թուրքիային, քանի որ Ադրբեջանին այսօր զինում է հենց Թուրքիան։
Որպես հարցի լուծում ցուցարարները տեսնում են ԱՄՆ–ի կողմից Արցախի անկախության ճանաչումը։
«Դուք Արցախին չեք տվել որևէ կարգավիճակ և դրա համար էլ խուսափում եք այսօր գնահատականներ հնչեցնել։ Տվեք Արցախին ինքնորոշում և մի վախեցեք գնահատականներ հնչեցնել Արցախում խաղաղ բնակչության նկատմամբ տեղի ունեցած ոճրագործությունների վերաբերյալ։ ԱՄՆ–ն այսօր հստակ պետք է ասի, որ Արցախի միջազգային ճանաչումը հարցի լուծում է»,–նշեցին ցուցարարները։
Հիշեցնենք, որ այսօր բողոքի զանգվածային ակցիա է տեղի ունեցել նաև Երևանում ՄԱԿ-ի գրասենյակի առջև։
Սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 18-ի ժամը 19:00-ի դրությամբ` հակառակորդի կրակոցների հետևանքով զոհվել են 710 զինծառայողներ և 36 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6259 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 22 ինքնաթիռ, 16 ուղղաթիռ, 195 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 566 տանկ և ՀՄՄ:
Ղազանչեցոցը 2 անգամ վերականգնած ճարտարապետը վստահեցնում է` եկեղեցին ավերված երկար չի մնա
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
«Թող իմանան` մենք ողջ ենք, լավ ենք». առաջնագծի տղաների` ժպիտ պարգևող լուսանկարները
