ԵՐԵՎԱՆ, 21 հոկտեմբերի – Sputnik. ՀՀ վարչապետ Նիկոլ Փաշինյանը Facebook-ի ուղիղ եթերում հաստատեց, որ առաջնագծում բավականին բարդ, դժվար իրավիճակ է ստեղծվել։
«Արցախի ողջ հարավով մարտական գործողություններ են ընթանում, և այստեղ կա մի շատ կարևոր նրբություն։ Մեր դիտարկումները ցույց են տալիս, որ հակառակորդը մարտի է նետում արդեն իսկ իր վերջին ռեզերվները։ Այո, նրանց ռեսուրսները շատ–շատ մեծ են, բայց մեր հերոսական զինծառայողներն աննկարագրելի ծավալի կորուստներ են պատճառում»,– ասաց Փաշինյանը։
Վարչապետն ընդգծեց` Ադրբեջանը հումանիտար հրադադարի չի համաձայնում նաև այդ պատճառով, քանի որ հումանիտար հրադադարի իմաստը նաև այն է, որ դիակները հավաքվեն, խնամվեն, պատշաճ ձևով հուղարկավորվեն։
«Ադրբեջանն այս կոնտեքստում վախենում է երկու բանից։ Առաջինը, որ իրենց կազմակերպած էյֆորիայի ֆոնին մեկ տասնյակ հազարի հասնող դիակներ պիտի «վերադառնան», երկրորդ, որ կբացահայտվեն նաև ահաբեկիչների ու թուրքական զորքերի զինվորների դիակներ։ Թեև համաշխարհային հանրությունը սա գիտակցել է, բայց Ադրբեջանը խուսափում է արդեն կոնկրետ ապացույցներից»,– ասաց նա։
Փաշինյանը շեշտեց նաև, որ հայկական ԶՈւ–ն հակառակորդի առելի քանակի զինտեխնիկա է ոչնչացրել` շուրջ 1.5 մլրդ դոլարի։
Նա վստահեցրեց` մենք իմացել ենք, որ այս պահը գալու է։ Նա կոչ արեց, որ ՏԻՄ ղեկավարները, գյուղապետները, ՀԿ–ները, կուսակցությունները ջոկատներ հավաքեն։ Վարչապետի խոսքով` այնպես չէ, որ բոլորը պետք է դաշտային հրամանատար դառնան. երկրի կառավարելիությունը պետք է պահվի։ Սակայն բոլոր ուսանողները, բիզնեսմենները և մյուսները պետք է շտապեն զինվորագրվել։
«Մոնթե Մելքոնյանը, Թաթուլ Կրպեյանը, Ջիվան Աբրահամյանը, Մովսես Գորգիսյանը, Վազգեն Սարգսյանը նայում են մեզ, և մենք պետք է նայենք նրանց աչքերի մեջ`առիթ չունենալով մեր հայացքը փախցնելու։ Նրանք հայրենիքին տվեցին ամեն ինչ ու չխնայեցին ոչինչ։ Հիմա եկել է մեր ժամը հայրենիքին տալ ամեն ինչ` ավտոմեքենաներ, որոնք պետք են առաջնագծում, միկոավտոբուսներ` կամավորներին առաջնագիծ տեղափոխելու համար, «ջիփեր» և այլն»,–ասաց Փաշինյանը։
Նա հավելեց` նայեք իրար աչքերի մեջ և իրար աչքերի մեջ գտեք հաղթանակը։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 21-ի ժամը 10:00-ի դրությամբ` հակառակորդի կրակոցների հետևանքով զոհվել են 772 զինծառայողներ և 37 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6459 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 23 ինքնաթիռ, 16 ուղղաթիռ, 202 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 580 տանկ և ՀՄՄ:
Այս տղերքն Արցախի հյուսիսային դիրքերն են պաշտպանում. հանգստի հազվադեպ րոպեները
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Պատերազմ Արցախում` առանց սեփական զինվորների. ո՞րն է Էրդողանի գերնպատակը
