ԵՐԵՎԱՆ, 22 հոկտեմբերի - Sputnik. Կանադայի իշխանությունները Կարմիր խաչի միջազգային կոմիտեին 350 հազար դոլար են փոխանցել Արցախում հումանիտար նպատակների համար։ Տեղեկությունը Twitter-ի իր էջում հայտնել է Կանադայի արտաքին գործերի նախարար Ֆրանսուա Ֆիլիպ Շամպանը։
Նախարարն ընդգծել է՝ Կանադան կրկին կոչ է անում երրորդ ուժերին չմիջամտել Ղարաբաղյան հակամարտությանը, իսկ կողմերին հորդորում է պահպանել հրադադարի ռեժիմն ու ստեղծել վերիֆիկացիոն մեխանիզմներ ԵԱՀԿ Մինսկի խմբի համանախագահների հովանու ներքո։
Նա նաև տեղեկացրել է, որ մշտական կապի մեջ է ՀՀ արտգործնախարար Զոհրաբ Մնացականյանի հետ։
In regular contact w/ @ZMnatsakanyan. 🇨🇦 continues to call for respect of ceasefire in #NagornoKarabakh & is contributing $350K to @ICRC for humanitarian efforts.We call on external parties to stay out of the conflict & creation of verification mechanisms by @OSCE Minsk Co-Chairs
— François-Philippe Champagne (FPC) 🇨🇦 (@FP_Champagne) October 22, 2020
Հիշեցնենք` Հայաստանի և Ադրբեջանի արտգործնախարարներ Զոհրաբ Մնացականյանն ու Ջեյհուն Բայրամովը հոկտեմբերի 9–ին Մոսկվա էին մեկնել` խորհրդատվություններ անցկացնելու։ ՌԴ արտգործնախարար Սերգեյ Լավրովի հետ համատեղ հանդիպումը տևեց գրեթե 11 ժամ և ավարտվեց համաձայնագրի ընդունմամբ, որը հակամարտության կարգավորման չորս կետ է պարունակում։
Մասնավորապես, կողմերը պայմանավորվեցին, որ հոկտեմբերի 10-ին, ժամը 12։00-ից սկսած հումանիտար նպատակներով հրադադար կհաստատվի ռազմագերիներին, այլ պահվող անձանց և զոհվածների մարմինները փոխանակելու համար՝ Միջազգային Կարմիր խաչի չափանիշներին համապատասխան։ Հրադադարի վերաբերյալ պայմանավորվածությունից հետո Ադրբեջանը շարունակեց հրետակոծել Արցախը։
Հոկտեմբերի 17-ին ՀՀ արտգործնախարարությունը հայտնեց, որ Հայաստանի Հանրապետությունը և Ադրբեջանի Հանրապետությունը երկրորդ պայմանավորվածությունն են ձեռք բերել. որոշվել է հոկտեմբերի 18-ին, տեղական ժամանակով ժամը 00:00-ից հաստատել մարդասիրական զինադադար։
Արցախի ՊԲ–ն, սակայն, հոկտեմբերի 18-ի առավոտյան տեղեկացրեց, որ 07:20-ի սահմաններում հրետանային ակտիվ կրակից հետո ադրբեջանական զինուժը հարավային ուղղությամբ անցել է հարձակման: Երկուստեք եղել են զոհեր ու վիրավորներ:
Ադրբեջանը մինչև այսօր էլ խախտում է հրադադարի վերաբերյալ պայմանավորվածությունները։