ԵՐԵՎԱՆ, 23 հոկտեմբերի – Sputnik. Արցախում զոհվել է ՀՀ ԱԺ նախկին պատգամավոր, նախկին քաղբանտարկյալ, ՀԱԿ անդամ Դավիթ Մաթևոսյանը։ Այս մասին Facebook-ում գրել է նրա դուստրը` Հերմինե Մաթևոսյանը։
«Հայրս, որ իր կյանքը նվիրել էր ազատ ու երջանիկ Հայաստանի կերտմանը, զոհվեց հանուն Հայաստանի…»,– գրել է նա։
Դավիթ Մաթևոսյանը 60 տարեկան էր։
Ծնվել է 1960թ. մարտի 22-ին Մեղրիի շրջանի Կարճևան գյուղում: Ավարտել է Հայկական գյուղատնտեսական ինստիտուտը` ինժեներ հիդրոտեխնիկի որակավորմամբ:
1982-83-ին աշխատել է Ագարակի հանքաշինական վարչությունում աշխղեկ, 1983-84-ին` Մեղրիի ոռոգման և ջրարբիացման համակարգերի վարչությունում ինժեներ, 1984-85-ին` ՀԼԿԵՄ Մեղրիի շրջկոմի հրահանգիչ, 1985-1991-ին` Կարճևանի պետտնտեսության տնօրեն, 1991-95-ին` Մեղրիի ՆԳ բաժնի պետ:
1995-99թթ–ին եղել է ՀՀ ԱԺ պատգամավոր, «Հանրապետություն» խմբակցության անդամ:
Դավիթ Մաթևոսյանը 2007թ. աշնանը Հայաստանում սկիզբ առած Համաժողովրդական շարժման առաջնորդներից էր և ՀՀ առաջին նախագահ, 2008թ. նախագահական ընտրություններում նախագահի թեկնածու` Լևոն Տեր-Պետրոսյանի նախընտրական շտաբի ղեկավար կազմի անդամ էր, քաղաքական թիմի առանցքային դերակատարներից մեկը:
2008թ–ի հունիսի 17-ին մարտի 1-ի գործով դատապարտվել է 3 տարվա ազատազրկման:
2009թ–ի հունիսի 22–ին համաներմամբ ազատ է արձակվել:
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 22-ի ժամը 21:45-ի դրությամբ` հակառակորդի կրակոցների հետևանքով զոհվել են 900 զինծառայողներ և 37 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6459 զոհ ունի և բազմաթիվ վիրավորներ։
Ըստ վերջին տվյալների՝ Ադրբեջանի զինված ուժերը կորցրել են 23 ինքնաթիռ, 16 ուղղաթիռ, 202 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 580 տանկ և ՀՄՄ:
Այս տղերքն Արցախի հյուսիսային դիրքերն են պաշտպանում. հանգստի հազվադեպ րոպեները
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Պատերազմ Արցախում` առանց սեփական զինվորների. ո՞րն է Էրդողանի գերնպատակը
