ԵՐԵՎԱՆ, 1 նոյեմբերի - Sputnik. Ադրբեջանաթուրքական ուժերը շարունակում են թիրախավորել ոչ միայն խաղաղ բնակավայրերն ու բնակիչներին, այլև՝ հերթական անգամ Արցախի ԱԻ պետական ծառայությանը: Հրթիռակոծվել է Ասկերանի շրջանային արտակարգ իրավիճակների բաժնի հրշեջ մեքենան: Տեղեկությունը հայտնում է Արցախի արտակարգ իրավիճակների ծառայությունը։
Փրկարար ծառայողները մարդասիրական նպատակներով խմելու ջուր էին տանում շրջանի խաղաղ բնակիչներին:
Անօդաչու թռչող սարքի մեկ հրթիռ ընկել է ուղիղ հրշեջ մեքենայի վրա և այրել: Բարեբախտաբար անձնակազմը չի տուժել:
«Նշենք, որ պատերազմի հենց առաջին օրերից թշնամական կողմի նշանակետում նաև հումանիտար առաքելություն իրականացնող փրկարար ծառայողներն են»,-նշված է արտակարգ իրավիճակների ծառայության Facebook-ի էջում:
Հիշեցնենք, որ սեպտեմբերի 27-ից ի վեր ադրբեջանական զինուժը թիրախավորում է Արցախի խաղաղ բնակչությանն ու քաղաքացիական ենթակառուցվածքները՝ հրթիռակոծելով խաղաղ բնակավայրեր, թիրախավորելով եկեղեցիներ, մշակութային շինություններ, դպրոցներ, մանկապարտեզներ ու նույնիսկ հիվանդանցներ, այդ թվում՝ Ստեփանակերտի ծննդատունը։
Ստեփանակերտը` հրթիռակոծությունից հետո. տեսանյութ ավերված շուկայից
Նոյեմբերի 1-ի ժամը 14։00-ի դրությամբ` հակառակորդի կրակոցների հետևանքով Արցախում զոհվել են 1166 զինծառայողներ և 45 քաղաքացիական անձինք։
